მკერდის სიმსივნის ოპერაციამდე ჯესი ჯეიმ აშშ-ში დაგეგმილი ტურნე გააუქმა, ხოლო ევროპული კონცერტები გადადო. მას ჯანმრთელობის პრობლემების გამო ქირურგიული ჩარევა ხელმეორედ სჭირდება.
მომღერალმა ამის შესახებ 28 აგვისტოს ინსტაგრამზე ვიდეო გამოაქვეყნა: „სამწუხაროდ, მეორე ოპერაცია უნდა გავიკეთო. სერიოზული არაფერია, მაგრამ წლის ბოლომდე აუცილებლად უნდა ჩატარდეს. ეს კი, სამწუხაროდ, ზუსტად ტურნეს შუა პერიოდს ემთხვევა. ძალიან ვწუხვარ ამის გამო, იმედგაცრუებული და სევდიანი ვარ, თუმცა უკეთესად უნდა გავხდე და გამოვჯანმრთელდე,” – განაცხადა ჯესი ჯეიმ.
მომღერალმა ნოემბერში დაგეგმილი ყველა კონცერტი გააუქმა, ოქტომბერში ევროპაში დაგეგმილი კონცერტები კი 2026 წლის აპრილისთვის გადადო.
ჯესი ჯეის ეს განცხადება ზუსტად სამი თვის შემდეგ გავრცელდა, მას მერე, რაც სინგლის, No Secrets-ის გამოსვლამდე ჯანმრთელობის პრობლემების შესახებ გაამხილა. მას მკერდის სიმსივნის ადრეული სტადია დაუდგინეს, ივლისში კი პირველი ოპერაცია ჩაიტარა. ექვსი კვირის შემდეგ ახალი სიმპტომებით, გარკვეული ინფექციის მიზეზით, კვლავ საავადმყოფოში მოხვდა. ივლისში ჩატარებული ანალიზების მიხედვით, კიბოს უჯრედები არ გავრცელებულა, რის შესახებაც ჯესი ჯეიმ ემოციური ვიდეო ინსტაგრამზე გააზიარა: „ეს სიხარულის ცრემლები რეალურია. მადლობა ლოცვისთვის, სიყვარულისთვის, თბილი სურვილებისა და იმ პოზიტიური ენერგიისთვის, რომელსაც თქვენგან ვიღებ,” – აღნიშნა მაშინ მომღერალმა.
ნახეთ ჯესი ჯეის ახალი ინსტაგრამ პოსტი:
