„დისნეიმ”, როგორც იქნა, „მოანას” კინოეკრანიზაციის ოფიციალური ტრეილერი გამოაქვეყნა და ხანგრძლივი ლოდინის შემდეგ ფანებს შეახედა, თუ როგორ გაცოცხლდნენ ანიმაციური გმირები ფილმში.
I Am Moana-ს სიმღერის ფონზე ერთწუთიან ტრეილერში ვხედავთ წყნარი ოკეანის კუნძულების ხედებსა და მთავარი გმირის დეტალებს. მხოლოდ ვიდეოს ბოლოს ჩნდება სრული კადრით კეთრინ ლაგაია – 18 წლის მსახიობი, რომელიც თავად მოანას განასახირეებს.
დუეინ ჯონსონი, რომელიც, როგორც ანიმაციაში, ამჯერადაც ნახევარღმერთ მაუის როლს ასრულებს, ტრეილერში მხოლოდ წამიერად ჩნდება, ისიც ზურგით, როცა კლდიდან წყალში ეშვება.
„მოანას” ფილმის პრემიერა კინოთეატრებში2026 წლის 10 ივლისს იგეგმება – ორიგინალი ანიმაციის გამოსვლიდან სრული 10 წლის შემდეგ. ანიმაცია, ისევე, როგორც მისი მუსიკა, გამოსვლისთანავე სენსაციად იქცა. საუნდტრეკმა 62 კვირა გაატარა „ბილბორდის” საუნდტრეკების ჩარტის ლიდერ პოზიციაზე და მე-2 ადგილზე გავიდა Billboard 200-ში.
რვა წლის შემდეგ დისნეიმ „მოანა 2” გამოუშვა, რომლის საუნდტრეკიც ასევე „ბილბორდის” რამდენიმე ჩარტის ტოპ ათეულში მოხვდა. ანიმაციის ორივე ნაწილში მოანას პერსონაჟს აული კრავალო ახმოვანებს. მართალია, ფილმში მას ეს როლი აღარ ერგო, თუმცა კრავალო გადამღები ჯგუფის წევრად რჩება და პროექტის აღმასრულებელი პროდიუსერის პოზიციას იკავებს.
„როცა 14 წლის ასაკში მოანა გავახმოვანე, ამან საოცრად შეცვალა ჩემი ცხოვრება და სათავე დაუდო ჩემს კარიერას,” – ამბობდა კრავალო ინსტაგრამზე გამოქვეყნებულ ვიდეოში 2023 წელს, მას შემდეგ, რაც კინოეკრანიზაციის გადაღება დაანონსდა. „ახლა კი პატივი მაქვს, ეს მისია წყნარი ოკეანის კუნძულის სხვა ახალგაზრდა გოგონას გადავაბარო, რათა მან პატივი მიაგოს ჩვენს საოცარ ხალხს, კულტურებსა და თემებს, რომლებიც ამ ამბავს შთააგონებენ.”
ნახეთ „მოანას” ფილმის ტრეილერი:
