დეკემბერში ნიუ-იორკი თავის ისტორიულ მუსიკალურ სივრცეში განსაკუთრებულ კულტურულ ღონისძიებას იხილავს. 2025 წლის 27 დეკემბერს ქალაქი ქართულ ჯაზ-ფესტივალს პირველად უმასპინძლებს. TERGI TO HUDSON JAZZ FESTIVAL საქართველოში – თერგის და აშშ-ში ჰადსონის მდინარის სახელებიდან იღებს ინსპირაციას, რომელიც სიმბოლურად ორ გეოგრაფიულ მდებარეობას მუსიკით აკავშირებს.
კულტურათშორისი თანამშრომლობის ფესტივალის მიზანია, ამერიკულ აუდიტორიას ერთ–ერთი ყველაზე ინოვაციური, თუმცა ნაკლებად ცნობილი ქართული ჯაზის სამყარო გააცნოს. დიდი ხნის განმავლობაში გლობალური სცენების ჩრდილქვეშ მყოფი ქართული ჯაზი ნიუ-იორკში სრულიად თანამედროვე იდენტობით – ღრმად ლირიკული, რიტმულად გამბედავი და საუკუნოვანი ფოლკლორული ტრადიციებით წარდგება.
Tergi to Hudson Jazz Festival-ის კონცეფცია არსობრივად კულტურათა იდენტობასა და მუსიკალური ჟანრების შერწყმას ედება საფუძვლად, რომელიც აღმოსავლეთსა და დასავლეთს შორის მუსიკალური დიალოგს საწყისია.
„ჯაზი ყოველთვის თავისუფლების ენა იყო. ეს ღონისძიება აჩვენებს, თუ როგორ ვითარდება ის, როდესაც ქართული მუსიკალური მემკვიდრეობა ნიუ-იორკის შემოქმედებით პროცესებს ხვდება.“ – აღნიშნავენ ფესტივალის ორგანიზატორები.
ღონისძიება სამი ცოცხალი სეტისგან შედგება, სადაც ქართველი არტისტები საავტორო პროექტებებით წარდგებიან.
არტისტები, რომელთაც ქართული ჯაზი ამერიკულ სცენაზე გააქვთ:
KHONDZI – Perkhuli
ნიუ-იორკში მცხოვრები საქსაფონისტი, კომპოზიტორი და პროდიუსერი Khondzi ცნობილია მისი უნიკალური მიდგომით, რომელიც ჯაზს, ფანკს, ქართულ ფოლკლორს და უძველეს ტრანს რიტმებს აერთიანებს. ბერკლისა და The New School-ის კურსდამთავრებული არტისტი ისეთ სცენებზე გამოდიოდა, როგორებიცაა Winter Jazzfest, Jazz at Lincoln Center, Birdland და მრავალი საერთაშორისო ფესტივალი.
მისი პროექტი Perkhuli ტრადიციული მუსიკალური მემკვიდრეობისა და ექსპერიმენტის სინთეზს წარმოადგენს, მასთან ერთად კი ასევე წარდგებიან: პაპუნა შარიქაძე – კლავიში, იონი ბენ გაცო – ბასი, როი ბენ ბაშატი – გიტარა, დათუჩა აბულაძე – დრამი.
პაპუნა შარიქაძე – კვინტეტი
პიანისტი, ვოკალისტი და კომპოზიტორი, რომლის შემოქმედებაც ქართულ მუსიკას თანამედროვე ჯაზის ენასთან აკავშირებს. პაპუნა შარიქაძე გამოდიოდა Blue Note-ზე, Birdland-ზე, Umbria Jazz-სა და Tbilisi Jazz Festival-ზე. მუსიკოსმა განათლება ბერკლის უნივერსიტეტში ჯონ პატიტუჩისა და დანილო პერესის ხელმძღვანელობით მიიღო. პაპუნა შარიქაძესთან ერთად კვინტეტში ასევე არიან: Khondzi -საქსოფონი, იონი ბენ არი – ბასი, როი ბენ ბაშატი – გიტარა, დათუჩა აბულაძე – დრამი.
საბა ჩაჩანიძე – All or Nothing at All
ვოკალისტი საბა ჩაჩანიძე ქართული მრავალხმიანობის და თანამედროვე ჯაზური სტილის შერწყმით არის ცნობილი. ის აქტიურად გამოდის საერთაშორისო სცენებზე, მათ შორის: Carnegie Hall, Vokal Total (ავსტრია), Frankfurt Book Fair. ბოლო დროს გამართული კონცერტით All or Nothing at All საბა ჩაჩანიძე მაიამიში, ნეიპლსში და თბილისში გამოვიდა. მანჰეტენზე კი კონცერტზე მასთან ერთად წარდგებიან: პაპუნა შარიქაძე – კლავიში, Khondzi – საქსაფონი, იონი ბენ გაცო – ბასი, როი ბენ ბაშატი – გიტარა და დათუჩა აბულაძე – დრამი.
ისტორიული ღონისძიება DROM NYC-ში გაიმართება. ეს არის კლუბი, რომელიც მსოფლიო მუსიკალური სცენის და ახალგაზრდა, საერთაშორისო არტისტების მხარდაჭერით არის ცნობილი.
2025 წლის ჯაზ-ფესტივალი ერთგვარი კულტურული დებიუტია, სადაც ქართულ ჯაზს პირველად ეძლევა შესაძლებლობა, ფესტივალის ფორმატით ამერიკის აუდიტორიის წინაშე წარდგეს.
Tergi to Hudson Jazz Festival-ის ბილეთების გაყიდვა უკვე დაწყებულია. ჯაზის მოყვარულებს ეძლევათ უნიკალური შესაძლებლობა, ისტორიაში პირველად მსგავს ფესტივალს დაესწრონ.
