2024 წელს გამოსულ დოკუმენტურ ფილმში I Am: Céline Dion, მომღერალმა მაყურებელს თავისი სამყაროს კულისები დაანახა – სივრცე, სადაც ის თავის მრავალრიცხოვან მაღალი მოდის კაბებსა და სასცენო სამოსს ინახავს. 20 იანვარს, სელინ დიონმა ვალენტინო გარავანის ხსოვნას სიყვარულით სავსე სიტყვები მუძღვნა. იტალიელ დიზაინერს განსაკუთრებული როლი აქვს შეტანილი არტისტის იმიჯის შექმნასა და ჩამოყალიბებაში. ვალენტინო გარავანი 19 იანვარს რომში, საკუთარ სახლში, 93 წლის ასაკში გარდაიცვალა.
„ჩემო ძვირფასო ვალენტინო, ყოველთვის ისეთს მხედავდი, როგორიც სინამდვილეში ვარ. შენი დიზაინი არასდროს ყოფილა მხოლოდ კაბები… ეს იყო ემოცია, თავდაჯერებულობა და ნაზი სილამაზე, რომელიც რეალობად იქცა“, – დაწერა სელინ დიონმა ინსტაგრამ პოსტში და მათი ერთობლივი ფოტო გააზიარა.
„წლების განმავლობაში ჩვენი მეგობრობა ჩემთვის ძალიან ძვირფასი იყო. შენ თავს ყოველთვის ძლიერად, მოხდენილად და ჭეშმარიტ მედ მაგრძნობინებდი. ეს არის საჩუქარი, რომლის მოცემაც მხოლოდ ნამდვილ ხელოვანებს შეუძლიათ. მადლობა შენი ხედვისთვის, კეთილშობილებისთვის და იმისთვის, რომ მსოფლიოს მაღალი მოდის არაჩვეულებრივი სტილი გაუზიარე. შენი მემკვიდრეობა იცოცხლებს ყოველი სილუეტის, ყოველი ნაკერის და უთვალავი დაუვიწყარი მომენტის სახით.” – აღნიშნა მომღერალმა და წერილის ბოლოს ხელი შემდეგი ტექსტით მოაწერა – „სამუდამოდ ჩემს გულში“.
ვალენტინოს 23 იანვარს რომში დაკრძალავენ.
ნახევარსაუკუნოვანი კარიერის განმავლობაში მას თითქმის ყველგან მხოლოდ ვალენტინოს სახელით მოიხსენიებდნენ. დიზაინერმა არაერთი თაობის სამეფო ოჯახის წევრები, ცნობილი სახეები და კინოვარსკვლავები შემოსა. მათ შორის იყვნენ: პირველი ლედი ჯეკი კენედი ონასისი, ჯულია რობერტსი, ელიზაბეთ ტეილორი, ჯენიფერ ლოპესი, პრინცესა დაიანა, გვინეტ პელტროუ, ენ ჰეთეუეი და მრავალი სხვა.
„მე ვიცი, რა სურთ ქალებს. მათ სურთ, იყვნენ ლამაზები.“ – ამბობდა ვალენტინო.
დიზაინერის ხსოვნის საპატივცემულოდ ფოტო ასევე გააზიარა გვინეტ პელტროუმ და აღნიშნა:
„ძალიან გამიმართლა, რომ ვიცნობდი და მიყვარდა ვალენტინო, ვიცნობდი პირადად ამ ნამდვილ ადამიანს. მამაკაცს, რომელიც შეყვარებული იყო სილამაზეზე, ოჯახზე, მუზებზე, მეგობრებზე, თავის ძაღლებზე, ბაღებსა და ჰოლივუდურ კარგ ისტორიებზე. ძალიან მიყვარდა. მომწონდა როგორ მთხოვდა, რომ ყოველთვის, როცა მასთან ვახშამზე მივიდოდი, ცოტა ტუში მაინც წამესვა. მიყვარდა მისი ეშმაკური სიცილი… ეს ეპოქის დასასრულს ჰგავს. ძალიან დაგვაკლდება მეც და ყველას, ვისაც იგი უყვარდა. განისვენე მშვიდად…” – წერს მსახიობი.
