Tatuza Jazz Club – ქალაქის უახლესი კულტურული სივრცეა, რომელიც ჯაზის ქართველი ლეგენდის, თამაზ „თათუზა“ ყურაშვილის სახელსა და მემკვიდრეობას უკავშირდება. კლუბი 2025 წლის 16 სექტემბერს გაიხსნა და მოკლე დროში იქცა ადგილად, სადაც მსოფლიოში აღიარებული შემსრულებლები და ჯაზის მოყვარულები იკრიბებიან.
სცენის ერთ-ერთი პირველი და სადებიუტო სესიების მთავარი შემსრულებელი ვირტუოზი პიანისტი ბექა გოჩიაშვილია, რომლისთვისაც ეს სივრცე თათუზას მემკვიდრეობის ერთგვარი გაგრძელებაა, სიმბოლური პასუხი და ერთგვარი მადლიერების ჟესტი ლეგენდარული მუსიკოსის მიერ წლების მანძილზე გაწეული ღვაწლისთვის.
„ჩემთვის ჯაზს ახსნა არ აქვს. ეს არის გრძნობა და ეს არის ის მუსიკალური ცხოვრების სტილი, რომელშიც იბადები, ის, რაც თავში მოგდის და რასაც უკრავ. მითუმეტეს იმპროვიზაციის დროს თუ არ გავაზიარე, ვერ დავიტევ ამდენ მუსიკას. 50/50 არის დამსახურება კონცერტის, მსმენელის და არტისტის. ყველაზე მნიშვნელოვანი პრიორიტეტი არის მაყურებელი, მსმენელი. თათუზა ყურაშვილი ჩემი ცხოვრების ძალიან მნიშვნელოვანი ნაწილია, თავიდან იყო მენტორი და მერე დავმეგობრდით. არანორმალურად განსაკუთრებული სვინგი ჰქონდა.
მუსიკალური სამყაროსთვის ეს ჯაზკლუბი არის ერთ-ერთი ყველაზე კარგი ფორმა მადლიერების გამოსახატად თათუზას ღვაწლისთვის, რაც გაიღო მომავალი მუსიკალური თაობისთვის.“ – ბექა გოჩიაშვილი.
Tatuza Jazz Club ყოველთვიურად მასპინძლობს მრავალფეროვან მუსიკალურ პროგრამას. ამერიკელი და ევროპელი რეზიდენტი ბენდების, საერთაშორისო ვარსკვლავებისა და ქართველი არტისტების სინთეზი თბილისს ავთენტურ, ცოცხალ და ევროპული მასშტაბის მუსიკალურ სივრცეს სძენს. ეს არის ადგილი, სადაც ჯაზის ტრადიცია და თანამედროვეობა ერთმანეთს ხვდება.
Tatuza Jazz Club-ის მომავალ ღონისძიებებზე დასასწრები ბილეთების შესაძენად ეწვიეთ ბმულს.
