როკვარსკვლავ ჯეკ უაიტის მეუღლემ, მომღერალმა ოლივია ჯინმა, ოთხწლიანი ქორწინების შემდეგ, 3 ივნისს, ნეშვილის სასამართლოში განქორწინების მოთხოვნით სარჩელი შეიტანა.
ჯინმა, რომელიც უაიტის კუთვნილი ლეიბლის, Third Man Records-ის არტისტი და თავადაც როკმუსიკოსია, ჯგუფ The White Stripes-ის ფრონტმენზე 2022 წელს, მათ მშობლიურ ქალაქ დეტროიტში გამართული კონცერტის დროს, პირდაპირ სცენაზე იქორწინა. ეს შემთხვევა მუსიკალური ინდუსტრიის ერთ-ერთ გამორჩეულ მომენტად მიიჩნეოდა.
ამ დრომდე არც ოლივია ჯინის და არც ჯეკ უაიტის წარმომადგენლებს ოფიციალური განცხადება არ გაუკეთებიათ.
სასამართლოში შეტანილი დოკუმენტების მიხედვით, ჯინი ითხოვს, რომ უაიტმა ალიმენტი გადაუხადოს და ჯანმრთელობის დაზღვევის დაფარვა განაგრძოს. მისი განცხადებით, იგი სრულად მეუღლის შემოსავალზეა დამოკიდებული.
ჯინი ასევე მოითხოვს, რომ ქორწინების პერიოდში ერთობლივად შეძენილი ქონება, მათ შორის უძრავი ქონება და ავეჯი, მხარეებს შორის სამართლიანად გადანაწილდეს. როგორც სარჩელშია აღნიშნული, მომღერალი იმედოვნებს, რომ მხარეები შეძლებენ წერილობითი შეთანხმების მიღწევას, რომელიც მათი აქტივებისა და ვალდებულებების სამართლიან განაწილებას უზრუნველყოფს. წყვილს საერთო შვილები არ ჰყავს.
ცნობისთვის ეს ჯეკ უაიტის მესამე ქორწინება იყო. პირველად მუსიკოსი The White Stripes-ის წევრ მეგ უაიტთან 1996-2000 წლებში, ხოლო მოგვიანებით მოდელსა და მომღერალ კარენ ელსონთან 2005-2013 წლებში იმყოფებოდა ქორწინებაში.
უაიტისა და ჯინის ურთიერთობის ერთ-ერთი ყველაზე დასამახსოვრებელი მომენტი 2022 წელს შედგა. მუსიკოსმა ოლივია ჯინს ხელი საკუთარი Supply Chain Issues ტურნეს გახსნის საღამოზე, სცენიდან სთხოვა. ეს The White Stripes-ის ჰიტის, Hotel Yorba-ს შესრულების დროს მოხდა, რომლის ტექსტშიც ქორწინების თემა ფიგურირებს. რამდენიმე წუთში წყვილმა სცენაზევე გაცვალა ბეჭდები, ცერემონია კი Third Man Records-ის თანადამფუძნებელმა ბენ სუონკმა ჩაატარა.
მიუხედავად სცენაზე გამართული საჯარო ცერემონიისა, წყვილმა ქორწინება ოფიციალურად მოგვიანებით გააფორმა.
2022 წელს, ტელეშოუ The Late Show With Stephen Colbert-ში სტუმრობისას, ჯეკ უაიტმა სცენაზე გამართული სპონტანური ქორწინების დეტალები გაიხსენა:
„მას ვკითხე: ახლავე გსურს დაქორწინება თუ გირჩევნია დავიცადოთ-მეთქი? მან კი მიპასუხა: არა, პირდაპირ ახლა, ეს ხომ შესანიშნავი დღეა!“ – იხსენებდა მუსიკოსი.
თუმცა, როგორც ოლივია ჯინის მიერ სასამართლოში წარდგენილი განქორწინების დოკუმენტებიდან ირკვევა, წყვილმა იურიდიულად ქორწინება მოგვიანებით, იმავე წლის დეკემბერში, ნეშვილში გააფორმა.
