პოპვარსკვლავმა 25 ივლისს სოციალურ ქსელში განცხადება გაავრცელა, სადაც დონალდ ტრამპის ადმინისტრაციის გადაწყვეტილება დაგმო. თეთრმა სახლმა არტისტის 2010 წლის ჰიტი Firework TikTok-ზე გამოქვეყნებულ ვიდეოში გამოიყენა, სადაც სამხედრო ოპერაციების კადრებია ასახული.
კვირის დასაწყისში თეთრი სახლის ოფიციალურ პლატფორმა TikTok-ზე გამოქვეყნებულ ვიდეოში კეტი პერის სიმღერის ფრაზა – boom, boom, boom დაბომბვის შავ-თეთრი კადრების ფონზე ჟღერს. პოსტს კი თან ერთვის აღწერა: „ირანი გაფრთხილებულია.“
„ამას კატეგორიულად არ ვეთანხმები,“ – დაწერა კეტი პერიმ სოციალურ ქსელში.
„ღრმად შეძრწუნებული და გაბრაზებული ვარ იმის გამო, რომ თეთრი სახლის TikTok-ზე სიმღერა Firework სამხედრო ოპერაციების ამსახველი კადრების წარმოსაჩენად გამოიყენეს. ამაზე თანხმობა არ განმიცხადებია, არც უკითხავთ და კატეგორიულად არ ვამართლებ ამ ქმედებას.” – წერს კეტი პერი პლატფორმა X-ზე.
„ეს სიმღერა დავწერე, როგორც იმედის, განკურნებისა და თვითრწმენის ჰიმნი იმ ადამიანებისთვის, რომლებიც ცხოვრების ყველაზე რთულ ეტაპს გადიან. იმის ნახვა, რომ გზავნილი, რომელიც თვითშეფასებასა და ადამიანების გამხნევებას ემსახურება, ნგრევისა და ძალადობის ფონად არის გამოყენებული, სრულიად ეწინააღმდეგება ყველაფერს, რასაც ეს სიმღერა გამოხატავს,“ – აღნიშნავს მომღერალი.
კეტი პერიმ თავისი განცხადება შემდეგი სიტყვებით დაასრულა: „ჩემი მუსიკა ხალხის გაერთიანებისთვისაა შექმნილი და არა ომის აღსანიშნავად“.
Firework კეტი პერის 2010 წლის ალბომ Teenage Dream-ის მესამე სინგლია, რომელიც მომღერლის ერთ-ერთ ყველაზე გამორჩეულ ჰიტად ითვლება. სიმღერა Billboard Hot 100-ის პირველ ადგილს ოთხი კვირის განმავლობაში იკავებდა.
კეტი პერი იმ ათეულობით არტისტთა შორისაა, რომლებმაც ტრამპის ადმინისტრაცია პოლიტიკური ვიდეოებისა და წინასაარჩევნო ღონისძიებების დროს მათი მუსიკის უნებართვოდ გამოყენების გამო გააკრიტიკეს.
ივნისში არიანა გრანდემ თეთრი სახლი მისი 2024 წლის სიმღერა Bye-ს გამოყენებისთვის დაგმო, რომელიც TikTok-ის ვიდეოში ICE-ის (აშშ-ის იმიგრაციისა და საბაჟო აღსრულების სამსახურის) სამსახურის მიერ დაკავებების ამსახველ კადრებს აჩვენებს.
მიმდინარე წელს კი ტრამპის ადმინისტრაცია ამავე მიზეზით არტისტმა Kesha-მაც გააკრიტიკა. მისი სიმღერა Blow ავტორის ნებართვის გარეშე TikTok-ის ვიდეოში გამოიყენეს, სადაც საბრძოლო თვითმფრინავებისა და სამხედრო დარტყმების კადრებია ნაჩვენები. ვიდეოს თან ერთვოდა წარწერა: „ლეტალურობა“.
ნახეთ კეტი პერის განცხადება X-ზე.
I am deeply appalled and angry to see “Firework” used on the @WhiteHouse TikTok account as a backing track for video footage of military strikes. I did not approve this, I was not asked, and I absolutely do not condone it.
— KATY PERRY (@katyperry) July 25, 2026
I wrote this song to be an anthem of hope, healing, and…
