„გრემის“ მფლობელი მუსიკოსის ჯონ ბატისტის შესახებ Netflix-მა დოკუმენტური ფილმი American Symphony გადაიღო. ფილმის ტრეილერი ნოემბრის შუა რიცხვებში გავრცელდა, პრემიერა კი, 29 ნოემბერს შედგება. ტრეილერიდან და ფილმის სინოფსისიდან ირკვევა, რომ ნამუშევარი არამხოლოდ მუსიკოსის შემოქმედებაზე, არამედ მის პირად ცხოვრებაზეც მოგვითხრობს. ბატისტის ცხოვრება, რომელიც საჯარო სივრცისგან დისტანცირებულია, საკმაოდ კომპლექსურია. ფილმი მაყურებელს მუსიკოსის რთულ პერიოდებს აცნობს, იმ დროს, როდესაც მისი პარტნიორი კიბოს ებრძოდა. დოკუმენტური ნამუშევარი ჯონ ბატისტის გამოცდილებაზე გვიყვება, როდესაც იგი Carnegie Hall-ის დებიუტისათვის ემზადებოდა.
ჯონ ბატისტის შემოქმედებითი ცხოვრება მრავალი ეტაპისაგან შედგება. მუსიკოსი თავისი ბენდით The Late Show With Stephen Colbert-თან შვიდი წლის განმავლობაში თანამშრომლობდა. ბატისტი „ოსკარის“ და „ოქროს გლობუსის“ მფლობელიც გახდა. კინოსამყაროს აღიარებული ჯილდოები Pixar-ის ცნობილი ანიმაციის, Soul-ის მუსიკალური გაფორმებისათვის მიიღო. 2022 წელს კი არტისტმა ხუთი „გრემი“ მოიპოვა.
რაც შეეხება დოკუმენტურ ფილმს, American Symphony ოსკაროსანი რეჟისორის, მეთიუ ჰაინემენის გადაღებულია. რეჟისორმა ბატისტის გვერდით შვიდი თვე გაატარა. აღსანიშნავია, რომ ფილმის თანაპროდიუსერი არის მიშელ და ბარაკ ობამების კომპანია Higher Ground Productions. Netflix-ის პრემიერამდე, 28 ნოემბერს, American Symphony შეერთებული შტატების კინოთეატრების ეკრანებზეც გამოდის.
დოკუმენტური სურათის პრემიერის თარიღამდე რამდენიმე დღით ადრე, ამერიკულმა Billboard-მა არტისტთან ინტერვიუ ჩაწერა. მუსიკოსმა ფილმის შექმნის პროცესზე, მენტალურ ჯანმრთელობასა და თავის შემოქმედებაზე ისაუბრა.
ფილმში კომპოზიციების შექმნის პროცესს ვხედავთ. ის უფრო მეტად კოლაბორაციულია, ვიდრე სტანდარტული. ასეთია თქვენი ჩვეული შემოქმედებითი პროცესი?
„ეს ფორმაზე ფიქრის პროცესი იყო, სანამ უშუალოდ კომპოზიციის შექმნის ნაწილი დაიწყება. შემდეგ მოდის ამ ფორმით ნაწარმოების შექმნა და ეს ფორმა შესაძლოა გზადაგზა შეიცვალოს იმის მიხედვით, თუ რა აღმოჩენებს გავაკეთებ. როდესაც სიმღერას, ინსტრუმენტულ კომპოზიციას, ან მელოდიას ვწერ, შესაძლოა ეს პროცესი ერთ მომენტში წარიმართოს. [სიმფონიაზე მუშაობისას] წინასწარ დაგეგმვაა საჭირო.“
როგორც ჯონ ბატისტი აღნიშნავს, იგი განსაზღვრავს, თუ როგორ გამოიყენოს მუსიკა ალეგორიის სახით და როგორ გადმოსცეს ფილოსოფია, რომელიც ამ სიმფონიის მიღმაა.
„თუ გავაანალიზებთ კლასიკური მუსიკის ფენომენს, რომელიც მე ძალიან მიყვარს და რომელსაც ჩემზე ჯაზთან და ამერიკულ მუსიკასთან ერთად უდიდესი გავლენა აქვს, ყველა დიდი კომპოზიტორი ხალხურ მუსიკას, ტრადიციებს და იმ ქვეყნის კულტურას ეყრდნობოდა, რომელშიც იზრდებოდა. American Symphony-ის მთავარი იდეა შემდეგი იყო: თუკი სიმფონიური ორკესტრისა და სიმფონიური კომპოზიტორების ადრესატი თანამედროვე ამერიკა იქნებოდა, თუკი [ნაწარმოებები] შეიქმნებოდა თანამედროვეობაში და მე შემოქმედი ვიქნებოდი, რას გამოვხატავდი? ეს ნამდვილად ამაღელვებელი იყო.“
ფილმში თერაპიისა და მენტალური ჯანმრთელობის შესახებ ძალიან გახსნილად საუბრობთ. რამ გიბიძგათ, რომ ასეთი გულახდილი ყოფილიყავით?
„ვიმედოვნებ, რომ ეს ბევრი ხელოვანისთვის შუქურა იქნება. ვფიქრობ, როდესაც ადამიანები წარმატებულები არიან, განსაკუთრებით კი საჯარო სცენაზე, ეს სიმარტივის ილუზიას ქმნის.“ – აღნიშნავს ჯონ ბატისტი.
„წარმატებულ ადამიანს როცა ეხება საქმე, არასოდეს ვიცით, რა დათმო და მიზნისათვის მისაღწევად რა გაკეთა. ჩვენ ყველა უბრალოდ ადამიანები ვართ, რომლებიც ცხოვრებაში ერთსა და იმავე საკითხებს ვუმკლავდებით. სჯობს, უფრო მეტად გახსნილები ვიყოთ, ვიდრე სოციალური მედიის მიღმა დავიმალოთ“ – ამბობს Billboard-თან ინტერვიუში ჯონ ბატისტი.
ნახეთ ჯონ ბატისტის შესახებ გადაღებული დოკუმენტური ფილმის ტრეილერი:
