The Bee Gees-ის პირველი დრამერი, კოლინ პეტერსენი, რომელიც ბენდს ადრეულ პერიოდშივე შეუერთდა, 78 წლის ასაკში გარდაიცვალა.
მუსიკოსის გარდაცვალების შესახებ ბენდის Best of The Bee Gees-ის, ფეისბუქ გვერდიდან 18 ნოემბერს გახდა ცნობილი: „დამძიმებული გულით ვაცხადებთ, რომ ჩვენი ძვირფასი მეგობარი კოლინ Smiley პეტერსენი გარდაიცვალა. მან ჩვენი ცხოვრება გაამდიდრა და ბენდი სიყვარულით, მზრუნველობით და პატივისცემით გააერთიანა. რთულია წარმოვიდგინოთ, როგორ გავაგრძელებთ ცხოვრებას მის გარეშე, მისმა ნათელმა ღიმილმა და ერთგულმა მეგობრობამ ბევრი რამ შეგვძინა, გვიყვარხარ, კოლ, მშვიდობით განისვენე.“ – ნათქვამია ბენდის განცხადებაში.
კოლინ პეტერსენი ძმების, ბარი, რობინ და მორის გიბების ბენდს, Bee Gees-ს, 1966 წელს შეუერთდა, როცა ჯგუფის ყველა წევრი ავსტრალიიდან ლონდონში გადავიდა. კოლინ პეტერსენი Polydor/Atco-ს ლეიბლის ქვეშ გამოსული ბენდის ოთხივე ალბომზე უკრავდა, მათ შორის 1967 წლის Bee Gees -ის ისეთ ჰიტებში, როგორიცაა New York Mining Disaster 1941, To Love Somebody და Holiday. კოლინ პეტერსენის ბოლო ნამუშევარი Bee Gees-თან ერთად 1970 წლის ალბომი Cucumber Castle იყო.
კოლინ პეტერსენმა ბენდი მენეჯერ რობერტ სტიგვუდთან უთანხმოების გამო დატოვა, რის შემდეგაც მომღერალთან და კომპოზიტორთან, ჯონათან კელისთან და ტიმ სტაფელთან ერთად ბენდი Humpy Bong ჩამოაყალიბა. ბენდის მოკლევადიანი არსებობის შემდეგ Humpy Bong დაიშალა. 1969 წელს კოლინ პეტერსენმა მეუღლესთან, ჯოან ნიუფილდთან ერთად სამენეჯერო კომპანია დააარსა, რომელიც ამ ინდუსტრიაში ხელოვანების მხარდაჭერასა და კარიერული განვითარების ხელშეწყობას ისახავდა მიზნად.
