პან-კავკასიური ახალგაზრდული ორკესტრი 2019 წელს, „წინანდლის კლასიკური მუსიკის საერთაშორისო ფესტივალის“ ფარგლებში დაარსდა და კავკასიის რეგიონში მცხოვრები ახალგაზრდა ხელოვანებით დაკომპლექტდა.
წელს შესარჩევი მოსმენები ცხრა ქვეყანაში გაიმართება, ესენია: საქართველო, სომხეთი, აზერბაიჯანი, თურქეთი, უკრაინა, მოლდოვა, ყაზახეთი, უზბეკეთი, თურქმენეთი.
ყოველწლიურად, პან-კავკასიური ახალგაზრდული ორკესტრისათვის, ნიჭიერი მუსიკოსების აღმოსაჩენად, ცოცხალი შესარჩევი მოსმენები ტარდება, სადაც მონაწილეობის მიღება 18-იდან 28 წლამდე ახალგაზრდა მუსიკოსებისთვის იქნება შესაძლებელი. შერჩეული მუსიკოსები ფესტივალის დაწყებამდე, ორი კვირის განმავლობაში, რეპეტიციებს წინანდალში, მსოფლიოს წამყვანი ორკესტრების პედაგოგების ხელმძღვანელობით გაივლიან. ორკესტრანტების მგზავრობას, განთავსებას, კვებას და სხვა დამატებით ხარჯებს უზრუნველყოფს წინანდლის ფესტივალი.
2025 წელს „წინანდლის კლასიკური მუსიკის ფესტივალის” მეშვიდე სეზონი 4 სექტემბრიდან 14 სექტემბრის ჩათვლით ჩატარდება. წინანდლის სცენაზე მსმენელი ისეთ მსოფლიო ვარსკვლავებს იხილავს, როგორიცაა: ჯანანდრეა ნოზედა, ზუბინ მეტა, კენტ ნაგანო, ხატია ბუნიათიშვილი, მიშა მაისკი და სხვა.
მოსმენაზე დასარეგისტრირებლად დაინტერესებულ პირებს შეუძლიათ შეავსონ აპლიკაციის ფორმა: https://pcyo.tsinandalifestival.ge/registration/
დამატებითი ინფორმაციისთვის კი ფესტივალის ბმულს შეგიძლიათ ეწვიოთ: www.tsinandalifestival.ge
პანკავკასიური ახალგაზრდული ორკესტრი წინანდლის საერთაშორისო ფესტივალის ძირითადი სიმფონიური ორკესტრია და მისი მუსიკალური ხელმძღვანელი მსოფლიოში განთქმული მაესტრო ჯანანდრეა ნოზედაა.
