24 თებერვალს Grimes-მა ორი აქამდე გამოუცემელი სიმღერების დემო ვერსია გამოუშვა. მომღერლის თქმით, გამოუქვეყნებელ ტრეკებს შორის ეს ორი სიმღერა მისი ფავორიტია.
გარკვეულწილად, ორივე მათგანი Grimes-ისთვის ახალი მიმართულებაა, განსაკუთრებით კი აკუსტიკური ტრეკი – The Fool, სადაც Grimes, 1994 წლის Mazzy Star-ის საკულტო ბალადა Fade Into You-ზე ახალ ტექსტს ასრულებს.
„ეს სიმღერა ყოველთვის მიყვარდა. უბრალოდ, Mazzy Star-ის ტრეკზე სხვა ტექსტი დავწერე, მაგრამ ფაილები სამუდამოდ დაიკარგა – ბავშვმა ლეპტოპზე სითხე გადაასხა. ეს მართლაც მშვენიერი იმპროვიზაცია იყო ჩემს ლექსზე. ნეტავ არ დავნებებულიყავი და საქმე ბოლომდე მიმეყვანა.“ – წერს Grimes-ი X-ზე.
პირველად ამ კომპოზიციის თიზერი 2024 წლის საპრეზიდენტო არჩევნების წინა დღეს გამოქვეყნდა, სადაც Grimes თავისთვის დამახასიათებელი ხმის ტემბრით შემდეგ ტექსტს მღერის: „სულელი ხარ, რადგან მთვარის ჩუქება დააპირე, მე კი მხოლოდ პოეზიის დაბრუნება შემიძლია. მითხარი, რა გავაკეთო და ვარსკვლავებს დავარწმუნებ, რომ შეგიყვარონ.“
რაც შეეხება მეორე სიმღერას, I Don’t Give a F–k, I’m Insane, ეს კომპოზიცია Grimes-ის მუსიკალურ სტილთან უფრო ახლოს დგას, რომელსაც საცეკვაო პოპ-დინამკა და Grimes-ის ჰაეროვანი ვოკალი ახლავს.
„უბრალოდ კარგი ვიბრაციების გამო დღეს SoundCloud-ზე რამდენიმე ძველი სიმღერის დემო ვერსია ავტვირთე. ეს სიმღერა 2019 წელს ჩავწერე, მასზე ბევრი დრო არ დამიხარჯავს, მაგრამ ჩემი ყოფილი მენეჯერი სულ მეუბნებოდა, რომ როგორმე ეს ტრეკი დამემთავრებინა და ჰიტად მექცია. როგორც ჩანს, დამავიწყდა… მას აშკარად დიდი პოტენციალი აქვს, ალბათ ერთ დღეს ვოკალს უკეთესად ჩავწერ და დავამუშავებ.“ – ამბობს მომღერალი.
ჟურნალ TIME-თან ინტერვიუში Grimes-მა ხელოვნური ინტელექტზე, მისი ყოფილი მეუღლის, ილონ მასკისა და მის საერთო შვილის ოთხი წლის X-ის საჯარო გამოჩენაზეც ისაუბრა. რამდენიმე ხნის წინ, ილონ მასკს ვაჟი თეთრ სახლში ვიზიტისას თან ახლდა.
„მართლა მინდა, რომ ხალხმა შეწყვიტოს ჩემი შვილის ფოტოების ყველგან გამოქვეყნება. ვფიქრობ, პოპულარობა ისეთი რამ არის, რაზეც ადამიანი თავად უნდა თანხმდებოდეს.” – აღნიშნა Grimes-მა და გააკრიტიკა ყოფილი პარტნიორი ილონ მასკი, რომელმაც შვილი თეთრ სახლში სამუშაო ვიზიტის დროს წაიყვანა.
„ის ასეთ ვითარებაში, საჯაროდ არ უნდა ჩანდეს. ეს კადრები აქამდე არ მინახავს. მადლობა, რომ გამაგებინეთ.” – დაწერა Grimes-მა, როცა თეთრ სახლში გადაღებულ კადრებში მისი მცირეწლოვანი შვილი იხილა.
Grime-მა X-ში ილონ მასკს პირდაპირაც მიმართა: „გთხოვ, მიპასუხე ჩვენი შვილის სამედიცინო საკითხთან დაკავშირებით. ბოდიშს ვიხდი, რომ ამას საჯაროდ ვწერ, მაგრამ ამ ვითარების იგნორირება უკვე აღარ შეიძლება.”
მოისმინეთ Grimes-ის სიმღერები: The Fool და I Don’t Give a F–k, im Insane.
