2 აპრილს ოლივია როდრიგომ დააანონსა, რომ მისი მესამე ალბომი You Seem Pretty Sad for a Girl So in Love ამ ზაფხულს გამოვა.
მომღერალმა ალბომის გარეკანიც გააზიარა, სადაც ის საქანელაზე ზის, ფონად კი ცისფერი ცა მოჩანს. გრემის მფლობელმა არტისტმა ინსტაგრამზე დაწერა:
„ჩემი მესამე ალბომი – you seem pretty sad for a girl so in love 12 ივნისს გამოდის. ძალიან ვამაყობ ამ ჩანაწერით და მოუთმენლად ველი, როდის მოისმენთ მას. ალბომის წინასწარი შეკვეთა უკვე შესაძლებელია.”
მომღერლის ვებგვერდზე უკვე ხელმისაწვდომია ალბომის სხვადასხვა ფორმატები ვინილის, CD-ისა თუ კასეტის სახით. ასევე იყიდება ავტოგრაფიანი ასლები, რომელთა გარეკანზეც ოლივიას ფოტოა, მინდორში ვარდისფერი კაბით.
ოლივია როდრიგომ 2023 წელს გამოუშვა ბოლო ალბომი Guts, რომელმაც Billboard 200-ის ჩარტში პირველი ადგილი დაიკავა. ალბომის წამყვანი სინგლი Vampire Billboard Hot 100-ის სათავეში მოექცა და მომღერლის მსოფლიო ტურნეს, Guts World Tour-ს ჩაუყარა საფუძველი. ტურნეს ძირითადი ნაწილი 2024 წლის თებერვლიდან ოქტომბრამდე პერიოდს მოიცავდა, თუმცა კონცერტები 2025 წლის პირველ ნახევარშიც გაგრძელდა.
Guts-ამდე იყო მისი სადებიუტო ალბომი Sour, რომელმაც ოლივიას სუპერვარსკვლავის სტატუსი მოუტანა. ამ ალბომმაც Billboard 200-ში პირველი ადგილი დაიკავა. ალბომში შედის ისეთი ჰიტები, როგორებიცაა: Drivers License და Good 4 U.
სერიალ High School Musical: The Musical: The Series-ის ვარსკვლავი თავის მესამე ალბომზე (OR3) მინიშნებებს დიდი ხნის განმავლობაში აკეთებდა. ყველაზე საინტერესო დეტალებზე მან British Vogue-თან ისაუბრა. მომღერალმა მაშინ გამოცემას უთხრა, რომ ახალი ალბომი სევდიანი სასიყვარულო სიმღერებით იქნებოდა სავსე, მათი განსაკუთრებულობა კი იმით ახსნა, რომ თითოეულ მათგანში შიშისა და მონატრების ელემენტები იგრძნობა.
„ვფიქრობდი, რომ როგორც კი იდეალურ ურთიერთობაში ვიქნებოდი, საკუთარ თავზე უკეთესი წარმოდგენა შემექმნებოდა და ყველაფერი თავის ადგილზე დალაგდებოდა. მაგრამ ეს ყველაფერი ასე მარტივად არ მუშაობს.“ – დაამატა ოლივია როდრიგომ, რომელიც იმ პერიოდში მსახიობ ლუის პართრიჯს ხვდებოდა.
იხილეთ ოლივია როდრიგოს ალბომის ანონსი:
