არიანა გრანდეს გულშემატკივრებს შეუძლიათ მშვიდად იყვნენ: პოპვარსკვლავი ნამდვილად დაბრუნდა სტუდიაში, რასაც თავად არტისტი 8 აპრილს ინსტაგრამზე გამოქვეყნებული ფოტოებით ადასტურებს. პარალელურად კი ჩნდება ვარაუდები, რომ მომღერალი უკვე მერვე სტუდიურ ალბომზე მუშაობს.
ინსტაგრამზე გამოქვეყნებულ პოსტში, რამდენიმე ფოტოზე არიანა გრანდე ხმისჩამწერ კაბინაშია გადაღებული, სადაც მიკროფონთან ვოკალს წერს, სხვა კადრებში კი პოპვარსკვლავი კომპიუტერთან აუდიოფაილებს არედაქტირებს. ფოტოკოლაჟში ერთადერთი არასტუდიური კადრია გამხმარი ყვავილი, რომელიც შესაძლოა, იმ ესთეტიკის მანიშნებელია, რომელზეც არტისტი ამჟამად მუშაობს.
ბუნებრივია, პოსტმა გულშემატკივრების დიდი აჟიოტაჟი გამოიწვია. „დიახ, გთხოვ!“ – დაწერა მისმა კოლეგამ და ჰიტების ავტორმა Lizzo-მ. „ეს ხდება!“ – აღნიშნა ერთმა გულშემატკივარმა, ხოლო მეორემ დაამატა: „AG8 მოდის“.
არიანა გრანდეს ბოლო ალბომი 2024 წელს გამოვიდა. მეშვიდე სტუდიური ნამუშევარი, სახელწოდებით Eternal Sunshine, Billboard 200-ის ჩარტში სამი კვირის განმავლობაში ლიდერობდა. გასულ წელს კი არტისტმა პროექტს რამდენიმე ახალი სიმღერა დელუქს ვერსიისთვისაც დაამატა.
ვინაიდან ზოგიერთი მსმენელისთვის ორწლიანი პაუზა მეტისმეტად დიდი დროა, გრანდეს ფანები ფიქრობდნენ, რომ პოპვარსკვლავი ახალი ალბომის გამოშვებიდან დიდ მუსიკალურ შესვენებას აიღებდა და სამსახიობო პროექტებზე მოახდენდა კონცენტრირებას. თავად არტისტიც ბოლო ერთი წლის განმავლობაში არაერთ ინტერვიუში მიანიშნებდა ამაზე, თუმცა აპრილის დასაწყისში გულშემატკივრებმა შეამჩნიეს, რომ მან ქვეტექსტები შეცვალა და ახალი ალბომის შესაძლო გამოშვებაზე დაიწყო მინიშნებები.
„ჩვენი გუნდი Brighter Days-ში მოუთმენლად ელის ამ ზაფხულს ჩვენი მისიის გაგრძელებას. გვინდა, რაც შეიძლება მეტ ადამიანს მივანიჭოთ სიხარული და სიმშვიდე.” – ამბობს არტისტი შეტყობინებაში, რომლითაც ივნისში დაგეგმილ მომავალ ტურნეზე, Eternal Sunshine-ზე მიანიშნებს.
