არიანა გრანდე თავისი ახალი ალბომისთვის, Petal-ისთვის ემზადება. პოპვარსკვლავმა 8 მაისს დააანონსა, რომ მისი მე-8 სტუდიური ალბომის მთავარ სინგლს, სახელწოდებით Hate That I Made You Love Me, რამდენიმე კვირაში გამოსცემს.
მომღერალმა ინსტაგრამზე სიმღერის გარეკანი გამოაქვეყნა. შავ-თეთრ ფოტოში გრანდეს სახის ახლო კადრი ჩანს, რაც ძალიან ჰგავს თავად ალბომის, Petal-ის ვიზუალს. გრანდეს მერ გაზიარებულ პოსტს თან ახლავს წარწერა: „Hate That I Made You Love Me… ჩემი პირველი სინგლი ალბომიდან – Petal.”
არიანამ აღნიშნა, რომ ეს არის მისი ერთ-ერთი რჩეული სიმღერა მათ შორის, რაც კი ოდესმე დაუწერია. მან ასევე გაამხილა, რომ სიმღერის თანაპროდიუსერები მაქს მარტინი და ILYA არიან, რომლებსაც მომღერალმა „მსოფლიოში საუკეთესო კოლაბორატორები და უძვირფასესი ადამიანები“ უწოდა.
„უბრალოდ ვეღარ ვითმენ, სანამ ეს სიმღერა თქვენი გახდება,” – დაწერა ვარსკვლავმა.
სიმღერა 29 მაისს გამოვა, Petal-ის გამოცემა კი ივლისის ბოლოს არის დაგეგმილი. ეს პროექტი 2024 წლის ალბომის, Eternal Sunshine-ის გაგრძელებაა, რომელიც Billboard 200-ის სათავეში მოხვდა. მასში ჩარტების პირველი ადგილის მფლობელი ორი ჰიტი – Yes, And? და We Can’t Be Friends (Wait for Your Love) არის შესული.
Hate That I Made You Love Me-ს დაანონსებამდე ერთი დღით ადრე გრანდემ ფანებს ალბომის თემატიკაზეც გაუზიარა დეტალები და გამოაქვეყნა ვიდეო, სადაც თავის გუნდთან ერთად ახალ ნამუშევარს განიხილავს. „ეს ალბომი ნამდვილად იმ ემოციებს გამოხატავს, რომელთა გამოაშკარავებაც აქამდე მერიდებოდა, ან მიჭირდა,” – აღნიშნა არიანა გრანდემ.
