მუსიკოსმა მებო ნუცუბიძემ, რომელიც მსმენელისთვის Mebo Renard-ის სახელით არის ცნობილი, ახალი სინგლი „გადის დრო“ წარადგინა.
სიმღერა მებოს შემოქმედებაში კიდევ ერთი ემოციური ნამუშევარია, რომელიც მსმენელს საკუთარი ინტერპრეტაციის თავისუფლებას უტოვებს. ავტორის თქმით, სიმღერის მთავარი გზავნილი წინასწარ განსაზღვრული არ არის და თითოეულ ადამიანს შეუძლია ის საკუთარ გამოცდილებასა და განცდებს მოარგოს.
Mebo Renard – მუსიკოსი:
„ამ სიმღერის შექმნას აქვს განსხვავებული ისტორია. წინა სიმღერას – „რამდენს“, იუთუბზე ძალიან საინტერესო კომენტარები აქვს. შევდივარ და ვკითხულობ ხოლმე. ჰოდა, შეიძლება უცნაურად და დაუჯერებლად ჟღერს, მაგრამ სწორედ ამ კომენტარებმა დამაწერინა ეს სიმღერა, რაც კიდევ ერთი დასტურია იმისა, რომ შთაგონებად შეიძლება იქცეს ნებისმიერი რამ.
ხანდახან უცხო ადამიანები ისე გიბიძგებენ, შექმნა რაღაც ახალი, რომ თვითონაც არ იციან. ამიტომ, მადლობა ყველას, ვინც იუთუბზე კომენტარებს წერს.
ძირითადი მესიჯი არ ვიცი, მირჩევნია ხალხმა თვითონ გადაწყვიტოს და მოარგოს ამა თუ იმ სათქმელს. საბოლოოდ მაინც ეგრე ხდება ხოლმე: მუსიკოსი ქმნის და მერე აღარ აქვს კონტროლი იმაზე, თუ რა ცხოვრებით იცხოვრებს ესა თუ ის სიმღერა.
„გადის დრო“ შეიძლება იყოს განშორებებზეც, მაგრამ ასევე ბედნიერ ურთიერთობებზეც, როცა აცნობიერებ, რომ ყოველი წამი ძვირფასია. ასე რომ, მსმემენლმა თვითონ გადაწყვიტოს და ვნახოთ, ამჯერად რა ტიპის კომენტარები გაჩნდება ამ სიმღერაზე.
ცალკე უნდა გამოვყოთ ის ხალხი, ვინც იმუშავა ამ სიმღერაზე: ლევან სიდიანი – სიმღერის თანაპროდიუსერი, ბეთხო – მიქსინგის და მასტერინგის ავტორი და აუცილებლად ცალკე უნდა აღვნიშნოთ ნუზი – ადამიანი, ვინც შექმნა ამ სიმღერის ქავერ არტი და ვიდეო.”
მოისმინეთ Mebo Renard-ის ახალი სიმღერა, რომელიც უკვე ყველა მუსიკალურ პლატფორმაზეა ხელმისაწვდომი:
