5 ივლისს Tbilisi Open Air 2026 გაიხსნა. ფესტივალი მსმენელს მე-15 საიუბილეო სეზონით დაუბრუნდა. მთავარმა სცენამ ტრადიციულად გააერთიანა ქართველი და უცხოელი შემსრულებლები.
ფესტივალის პირველი ნაწილი ქართველ შემსრულებლებს დაეთმო. მთავარ სცენაზე პირველი გამხსნელი აქტით მსმენელის წინაშე AlterVision-ის კონკურსის – Tbilisi Newcomers-ის გამარჯვებული, ალტერნატიული ჰიპ-ჰოპ მუსიკალური პროექტი – OCD წარდგა.
ფოტო: ნინუცა კაკაბაძე/Billboard Georgia
ამის შემდეგ სცენაზე ქართული ალტერნატიული ბენდი Afternoon Version გამოვიდა. ბენდმა, რომელიც 1993 წელს ჩამოყალიბდა, შეასრულა სინგლები თავისი მრავალწლიანი დისკოგრაფიიდან.
ფოტო: ნინუცა კაკაბაძე/Billboard Georgia
ფესტივალის მთავარ სცენაზე პირველი საერთაშორისო გამომსვლელი Tbilisi Open Air-ის ერთ-ერთი ჰედლაინერი, შვედი მუსიკოსი და სიმღერების ავტორი, ჯეი-ჯეი იოჰანსონი იყო. არტისტს ქართველი მსმენელი უკვე კარგად იცნობს, რადგან მან ბოლო 10 წელიწადში თბილისში არაერთი კონცერტი გამართა. ჯეი-ჯეი იოჰანსონის სეტლისტი მოიცავდა მის ისეთ ცნობილ ჰიტებს, როგორებიცაა: On the Radio, So Tell the Girl That I Am Back in Town, It Hurts Me So და სხვა. არტისტმა თავისი გამოსვლა დაასრულა Sex Pistols-ის ბასისტის, სიდ ვიშესის სიმღერის – My Way-ს ქავერ ვერსიით. აღსანიშნავია, რომ ჯეი-ჯეი იოჰანსონის პერფორმანსი აუდიტორიასთან კომუნიკაციით გამოირჩეოდა.
ფოტო: ნინუცა კაკაბაძე/Billboard Georgia
Tbilisi Open Air-ის გამხსნელ დღეს მსმენელმა ქართველი არტისტების კოლაბორაციაც იხილა – სცენაზე ბენდები MokuMoku და Skazz ერთობლივი პერფორმანსით წარდგნენ.
ფოტო: ნინუცა კაკაბაძე/Billboard Georgia
ფესტივალის პირველი დღის ლაინაფის ნაწილი იყო გამორჩეული ქართული ინდი-როკ ბენდი Bedford Falls. ბენდმა ფესტივალის მსმენელისათვის, ძველ ჰიტებთან ერთად, შეასრულა სიმღერები ახალი ალბომიდან, რომელიც 2026 წლის მარტში გამოიცა.
ფოტო: ნინუცა კაკაბაძე/Billboard Georgia
Tbilisi Open Air-ის გამხსნელი დღე ფესტივალის მთავარი ჰედლაინერის – Slowdive-ის პერფორმანსით დაიხურა. ბრიტანული შუგეიზის აღიარებული ბენდი, რომელიც 1989 წელს ჩამოყალიბდა, საქართველოს პირველად ეწვია.
ფოტო: გიო მაჭავარიანი/Billboard Georgia
მთავარი სცენის დასრულების შემდეგ გაიხსნა Zion Garden და MZESUMZIRA-ს სცენა, რომელიც ფესტივალს წელს პირველად შეუერთდა. რაც შეეხება Zion Garden-ს, სცენა წელს 10 წლის იუბილეს აღნიშნავს და ამ თარიღის აღსანიშნავად ის მსოფლიოში ცნობილ პროდიუსერს, Ace Ventura-ს დაეთმო.
ფოტო: გიო მაჭავარიანი/Billboard Georgia
წელს Tbilisi Open Air ორი დღის განმავლობაში გრძელდება. ფესტივალი 5 ივლისს დაიხურება.
