19 ივლისს ბორჯომში ფესტივალი „ღამის სერენადები” გაიხსნა. საზეიმო კონცერტი სასტუმრო „ბორჯომი-ლიკანში” გაიმართა, სადაც მსმენელის წინაშე წარდგნენ: ბეატრიჩე ვენეცი – დირიჟორი, იუკი სერინო – ვიოლინო, ლელა მჭედლიძე – ფესტივალის ორკესტრ „საქართველოს ვირტუოზების” პირველი ვიოლინო.
წლევანდელი ფესტივალი ლიანა ისაკაძის დაბადებიდან 80 წლის იუბილეს ეძღვნება. 2024 წლიდან „ღამის სერენადები” სწორედ ლეგენდარული მევიოლინის სახელს ატარებს.
საფესტივალო პროგრამა ჟანრობრივი მრავალფეროვნებით გამოირჩევა. საქართველოს სამ ქალაქში ჯამში შვიდი კონცერტი გაიმართება, რომელთა ფარგლებშიც სცენაზე წარდგებიან მსოფლიოში აღიარებული ქართველი და უცხოელი მუსიკოსები, ასევე ახალგაზრდა, ნიჭიერი შემსრულებლები: ბეატრიჩე ვენეცი, იუკი სერინო, ანდრეს გაბეტა, მარიო სტეფანო პიეტროდარკი, გლორია კამპანერი, იან-ერიკ გუსტავსიონი, ანა-ლიზა ბეზროდნი, სანდრო ნებიერიძე, სანდრო გეგეჭკორი, ნელო სალცა, მარიამ მაჩიტიძე, ნიკოლოზ ვადაჭკორია, გიორგი შიოლაშვილი, ლელა მჭედლიძე და გია ყანჩელის სახელობის ახალგაზრდული ორკესტრი.
გიორგი ისაკაძე – „ღამის სერენადების” სამხატვრო ხელმძღვანელი:
„ჩვენთვის უმნიშვნელოვანესია ფესტივალის ქალაქ ბორჯომში გამართვა. მნიშვნელოვანია, რომ ეს ტრადიცია აღდგა. ბრწყინვალედ ჩაიარა გახსნითმა კონცერტმა. ახლა კი ფესტივალი ქალაქ ბათუმში გადაინაცვლებს, სადაც სამი უმნიშვნელოვანესი კონცერტი გველოდება. წლევანდელი კონცერტების სერია კი თბილისში საზეიმოდ დაიხურება.”
ბეატრიჩე ვენეცი – დირიჟორი:
„პირველად ვარ ქალაქ ბორჯომში. მოხარული ვარ, საოცრად ემოციური წუთებია. მსმენელის ემოციები, რომელიც ჩვენზე გადმოდის, სასწაულია. მიხარია, რომ ასეთი გულთბილი მაყურებელი და მსმენელი გვსტუმრობდა.”
„ღამის სერენადები” 21, 23 და 25 აგვისტოს ბათუმში გადაინაცვლებს. ხოლო 16, 18 და 20 სექტემბერს ფესტივალს უკვე თბილისი უმასპინძლებს.
ბილეთები შეიძინეთ ბმულზე.
