ბიბი კვაჭაძემ ახალი ნამუშევარი გამოსცა. მუსიკოსმა მსმენელს „წინწყაროს” საკუთარი ვერსია შესთავაზა, რომელსაც გიორგი უშიკიშვილი ასრულებს. „წინწყარო (Bibi’s Version)” კახური სატრფიალო სიმღერის ყველასთვის ნაცნობ ვოკალს სრულიად თანამედროვე არანჟირებასთან აერთიანებს.
„მთელი ცხოვრება მინდოდა ამ ვერსიის გაკეთება და სულ ვფიქრობდი, თუ როგორ გამეკეთებინა. დავურეკე გიორგი უშიკიშვილს, ავუხსენი, რა მინდოდა და ამ ექსპერიმენტზე წამოსვლა შევთავაზე. დამთანხმდა და ამ სიმღერის სიყვარულიდან და გიორგის ფანტასტიკური შესაძლებლობებიდან გამომდინარე, გავბედე და „ამოვატრიალე” და გავამდიდრე ეს ნაწარმოები. გიორგი კი შეუდარებელი მომღერალია. მის მიერ ნამღერი „წინწყარო” ჩემთვის უბადლოა და ზუსტად ისე ასრულებს, როგორც კახურ კილოს, მის მუსიკალურ დიალექტს, მდიდარ ორნამენტსა და მელიზმატიკას სჭირდება. „წინწყაროს” პროექტისთვის სწორედ ასეთ შემსრულებელს ვეძებდი და ამიტომაც შევაჩერე არჩევანი მასზე,” – ამბობს Billboard საქართველოსთან საუბარში ბიბი კვაჭაძე.
მუსიკოსის თქმით, „წინწყაროსადმი” სიყვარული ჰამლეტ გონაშვილის შესრულებიდან მოდის, რომელიც მისი მასწავლებელი და უფროსი მეგობარი იყო. სწორედ ლეგენდარულ ქართველ მომღერალს ეძღვნება ახალი ნამუშევარიც.
მოუსმინეთ ბიბი კვაჭაძისა და გიორგი უშიკიშვილის „წინწყაროს”:
