სამხრეთკორეელი შემსრულებელი Psy, რომელიც მსოფლიომ 2012 წელს ჰიტით Gangnam Style გაიცნო, ხუთწლიანი პაუზის შემდეგ, 29 აპრილს ახალი, რიგით მეცხრე ალბომით “Psy 9th” დაბრუნდება.
44 წლის კეიპოპ მუსიკოსმა ახალი ნამუშევარი ინსტაგრამზე დააანონსა და იმედი გამოთქვა, რომ მისი 2022 წლის სიმღერებიც მსგავს წარმატებას მიაღწევს.
კეიპოპ შემსრულებლის ბოლო სტუდიური ალბომი “4X2=8” 2017 წელს ლეიბლზე YG Entertainment გამოიცა. მოგვიანებით მან თავისი ხმისჩამწერი სტუდია P Nation შექმნა, რომელშიც სხვადასხვა არტისტი, მათ შორის კორეელ-ამერიკელი რეპერი Jessi, მომღერალი HyunA და სხვები გააწევრიანა.
პაკ ჩესანმა შემოქმედებითი მოღვაწეობა 2001 წელს დაიწყო. მან მსოფლიო პოპულარობას ჰიტით Gangnam Style მიაღწია, რომელმაც ბილბორდის ცხელ ასეულში მეორე პოზიცია დაიკავა. ამასთან, მასზე გადაღებული კლიპი პირველი ვიდეო გახდა იუთუბზე, რომლის ნახვებმაც მილიარდს გადააჭარბა. წარმატება ხვდა წილად მუსიკოსის კიდევ ერთ სინგლს Gentleman, რომელიც Billboard Hot 100-ში მეხუთე ადგილზე გავიდა. შემსრულებელს დღემდე 8 სტუდიური ალბომი აქვს გამოშვებული.
