ლეგენდარული ამერიკელი ჰიპ ჰოპ არტისტის, ნოტორიუს ბიაიჯის 50 წლის იუბილესთან დაკავშირებით მისი ახალი ტრეკი G.O.A.T. გამოუშვეს. ნამუშევარში არენბი შემსრულებელი, თაი დოლა საინი და ნიგერიელი მომღერალი, ბელა ალუბო მონაწილეობენ. აღსანიშნავია, რომ მუსიკოსის წარმომადგენლობის მართვას 2021 წლის აპრილში კომპანია WME Legends შეუდგა.
კომპოზიციის პროდიუსინგზე ელიოტ ოსაჯიმ და ქეიომ იმუშავეს.
კრისტოფერ უოლასს, სასცენო სახელით The Notorious B.I.G., ყველა დროის გამორჩეული ჰიპ ჰოპ არტისტი და ჟანრის ერთ-ერთი ყველაზე პოპულარული წარმომადგენელია. მან მუსიკალური კარიერა 1992 წელს გაერთიანება Bad Boy Records-ში დაიწყო. 1994 წელს გაყიდვაში ბიგის სადებიუტო ალბომი Ready To Die ჩაეშვა, რომელმაც რეპერს საყოველთაო აღიარება მოუტანა.
1997 წლის 9 მარტს მომავალი სტუდიური ნამუშევრის პრომოუშენის ფარგლებში კალიფორნიაში მყოფი უოლასი დღემდე უცნობმა პირმა ცეცხლსასროლი იარაღით მოკლა. მუსიკოსის გარდაცვალებიდან ორ კვირაში გავრცელებულმა ჩანაწერმა Life After Death უდიდეს კომერციულ წარმატებას მიაღწია. მსოფლიო მასშტაბით 12 მილიონამდე გაყიდული ასლით ალბომმა ბრილიანტის სტატუსი მოიპოვა. აღსანიშნავია, რომ ბილბორდის ცხელი ასეულის მეორე პოზიციაზე არტისტის ჰიტები Big Poppa, Juicy და One More Chance არის მოხვედრილი. Billboard 200-ის სათავეში კი Life After Death გავიდა. 2020 წელს ბიგი როკ-ენ-როლის დიდების დარბაზში შეიყვანეს. რეჩიტატივის კითხვის უნიკალური მანერით გამორჩეულ შემსრულებელს არაერთი გავლენიანი გამოცემა ყველა დროის საუკეთესო რეპერად მოიხსენიებს.
