ევროვიზიის კონკურსის ჩატარება მასპინძელი ქვეყნის სტატუსით, უკრაინის მაგივრად დიდ ბრიტანეთში გაიმართება
კონკურსის ჩატარების სურვილი შვიდმა ქალაქმა გამოთქვა, საბოლოოდ კი მხოლოდ ორი შეირჩა – პირველი, ლეგენდარული ჯგუფის The Beatles-ის მშობლიური ქალაქი ლივერპული და გლაზგო. საბოლოო გადაწყვეტილება კი სულ რამდენიმე კვირაში იქნება ცნობილი.
2022 წლის ევროვიზიის კონკურსში უკრაინულმა ფოლკ – რეპის ჯგუფმა Kalush Orchestra-მ გაიმარჯვა, მეორე ადგილი კი ბრიტანელ სემ რაიდერს ერგო.
უკრაინასა და რუსეთს შორის ომი ჯერ კიდევ აქტიურ ფაზაშია, გამომდინარე აქედან ევროპის მაუწყებელთა კავშირმა (EBU) განაცხადა, რომ კონკურსის მონაწილეებისთვის მისი ორგანიზებისთვის და ღონისძიების სამუშაო გუნდისთვის უსაფრთხოების გარანტიები არ არსებობს. “2023 წლის ევროვიზია უკრაინის გამარჯვებას მიეძღვნება, რაშიც ჩვენ მტკიცედ ვართ დარწმუნებული“ – აღნიშნა ფილიპ პაროლმა, რომელიც მასპინძელი ქალაქის შესარჩევი კომიტეტის თავმჯდომარე გახლავთ.
ევროვიზიის კონკურსი 1956 წელს, მეორე მსოფლიო ომის შემდეგ დაარსდა, მისი მიზანი ომის შედეგად დაზარალებულთა დახმარება და ევროპის გაერთიანება იყო. ევროვიზიის კონკურსში 40- ზე მეტი ქვეყანა იღებს მონაწილეობას, მათ შორის გეოგრაფიულად არაევროპული ქვეყნები: ისრაელი და ავსტრალია.
ორგანიზატორების მცდელობა განასხვაონ პოპ მუსიკა და პოლიტიკა ერთმანეთისგან, აკრძალონ გამოხატული პოლიტიკური სიმბოლოები და ტექსტები ხშირად წარუმატებელია, რადგან გლობალური დაძაბულობა კონკურის დროს ხშირად თავს იჩენს. უნდა ითქვას, რომ რუსეთი წლევანდელი კონკურსიდან უკრაინაში შეჭრის გამო სიიდან ამოიღეს.
