18 ნოემბერს „რესპუბლიკაში” მსმენელის წინაშე კალიფორნიელი მულტიინსტრუმენტალისტი შემსრულებლის, ჯუდით ჰილის მუსიკალური საღამო გაიმართება.
ჯუდით ჰილის ხმა ყველასთვის ნაცნობია. ის მღეროდა ისეთი მუსიკოსების ბექვოკალში, როგორებიც არიან სტივი უანდერი, ელტონ ჯონი, რობი უილიამსი და სხვები.
ჯუდით ჰილის კარიერის ყველაზე გამორჩეული მოვლენა მაიკლ ჯექსონთან დუეტია. სიმღერა “I Just Can’t Stop Loving You” მათ 2009 წელს This Is It ტურნეს ფარგლებში ერთად უნდა შეესრულებინათ. თუმცა ტურნემდე ჯექსონი გარდაიცვალა. დაკრძალვის ცერემონიალზე სწორედ ჯუდითს ხვდა წილად პატივი, შეესრულებინა თავად პოპის მეფის სიმღერა “Heal the World”, რაც ცერემონიალის ერთ-ერთ კულმინაციურ მომენტად იქცა. ამის შემდეგ ჯუდითმა თავისი პირველი სინგლი “I Will Always Be Missing You” გამოსცა, რომელიც სწორედ მაიკლ ჯექსონს მიუძღვნა.
ჯუდით ჰილი საკუთარ თავს თამაშობს ფილმში 20 Feet from Stardom, რომელმაც საუკეთესო მუსიკალური ფილმისთვის გრემი, ხოლო საუკეთესო დოკუმენტური ფილმისთვის ოსკარი დაიმსახურა. ფილმი ბექვოკალისტების ცხოვრებაზეა.
მომღერალს გამოცემული აქვს 4 ალბომი. მის სადებიუტო ალბომზე Back in Time თავად პრინცმა იმუშავა. Მუსიკოსმა ბექვოკალისტის შესახებ მაშინ გაიგო, როცა ჯუდითი სატელევიზიო ინტერვიუში ამბობდა, რომ პრინცთან მუშაობაზე ოცნებობდა. პრინცი გოგონათი დაინტერესდა და მისი სიმღერების მოსმენის შემდეგ ჯუდითის პირველი ალბომის პროდიუსერიც გახდა.
ნახეთ ჯუდით ჰილის მიმართვა ქართულ აუდიტორიას
