ნიკ კარტერმა მისი ძმის – აარონ კარტერის გარდაცვალების გამო გამოხატული მხარდაჭერისათვის ფანებს მადლობა გადაუხადა.
„დიდად მადლობელი ვარ ჩემი ძმის მიმართ გამოხატული სიყვარულისა და მხარდაჭერისთვის. ჩვენ Მის სახელზე საქველმოქმედო ფონდი შევქმენით. ამით დავეხმარებით იმ ოჯახებს, ვის ბავშვებსაც ფსიქიკური ჯანმრთელობის პრობლემები აქვთ.”
ფონდს On Our Sleeves ჰქვია. სოციალურ ქსელში ლინკიცაა მითითებული, სადაც თანხის შეწირვაა შესაძლებელი. საიტზე წერია: „მადლობა იმედის საჩუქრისთვის. აარონის პატივისცემით თქვენ ეხმარებით ნიკს, ენჯელსა და მათ ოჯახს, რომ სხვებს დაეხმარონ.“
აარონ კარტერი 34 წლის ასაკში გარდაიცვალა. გარდაცვალების მიზეზი უცნობია.
უმცროსი ძმის გარდაცვალების შემდეგ ნიკმა მათი ბავშვობის ფოტოები გაავრცელა წარწერით: „ჩემი გული განადგურებულია. მიუხედავად იმისა, რომ მე და ჩემს ძმას რთული ურთიერთობა გვქონდა, ჩემი სიყვარული მის მიმართ არასდროს განელებულა. მე ყოველთვის მქონდა იმედი, რომ ერთ მშვენიერ დღეს გადაწყვეტდა, ჯანმრთელ ცხოვრებას დაჰბრუნებოდა და იპოვიდა იმ დახმარების ხელს, რომელიც ძალიან სჭირდებოდა. ხანდახან გვინდა, რომ ჩვენს დანაკარგში სხვა ვიღაც ან რაღაც დავადანაშაულოთ, მაგრამ სიმართლე ისაა, რომ მთავარი დამნაშავე აქ დამოკიდებულება და ფსიქიკური ჯანმრთელობაა.”
