ნოდარიკო ხუციშვილი ახალ სიმღერასა და მასზე გადაღებულ ვიდეოკლიპს აზიარებს. Pocket Song – ასე ჰქვია კომპოზიციას, რომლის მუსიკისა და ტექსტის ავტორი თავად მომღერალია. არანჟირება დათო კაკულიას, აუდიო მასტერინგი კი Sandro Bibich-ს ეკუთვნის. კლიპის რეჟისორი ლაშა ჩაგელიშვილია.
ნოდარიკო ხუციშვილი:
„სიმღერა იმ შეგრძნებებზეა, რომლებიც მე თვითონ მქონია მოგზაურობის დროს. როცა სადმე მივდივარ და გზაში მუსიკაა ჩემი თანმხლები. სიმღერას, რომელიც ძალიან გიყვარს და შენს მოგზაურობას სხვანაირს ხდის, Pocket Song ანუ ჯიბის სიმღერა ჰქვია. ჩემი ტექსტიც ამაზეა, რომ ეს სიმღერა არის შენი. შეგიძლია ჯიბეში ჩაიდო და ყველგან წაიღო, სადაც წახვალ. მერე არის ეს შეგრძნებები – გზაში რომ ქარი გიბერავს, ფანჯარაში რომ მზე შემოდის და ნელ-ნელა თვალები გინათდება იმაზე ფიქრით, თუ რა იქნება… და ამ დროს მისამღერი ეგეთია, რომ გადახტი ამ მოგზაურობაში, გაჰყევი ბოლომდე მზის შუქს და ნახე, სად წაგიყვანს. სიმღერაში ჰიპ-ჰოპის ნაწილიცაა, რომელიც სწორედ ამაზეა, რომ ცხოვრებაში ბევრ რაღაც არ მეორდება და უნდა დაიჭირო მომენტი.
რაც შეეხება კლიპს, მთლიანად ფოტოებით არის აწყობილი. შინაარსობრივად კი სიმღერის ტექსტს ეხმიანება – ეს სიარული, მატარებლის დეტალები, რომელიც მგზავრობასთან ასოცირდება – ეს ყველაფერი თემატურად და აზრობრივად კარგად ჩაჯდა მთლიან კონცეფციაში.”
Pocket Song ნოდარიკო ხუციშვილის რიგით მეორე საავტორო სიმღერაა. უახლოეს მომავალში მომღერალი საავტორო ალბომის გამოშვებასაც გეგმავს.
ნახეთ ვიდეოკლიპი
