Apple TV+ მაყურებელს ჯონ ლენონის მკვლელობის შესახებ სამ-ნაწილიან დოკუმენტურ სერიალს შესთავაზებს. John Lennon: Murder Without a Trial – ასე ჰქვია სერიალს და ის მკვლელობის მოწმეების ინტერვიუებს და დანაშაულის ადგილის აქამდე უცნობ ფოტოებს მოიცავს. როგორც ნამუშევრის შემქმნელები მაყურებელს ჰპირდებიან, ეს სერიალი „მუსიკოსის ცხოვრებას და მკვლელობას ნათელს მოჰფენს“. სერიალის ერთ-ერთი საკვანძო ფიგურა ლენონის მკვლელი – მარკ დევიდ ჩეპმენია.
სერიალის სინოფსისში აღნიშნულია, რომ ეს ნამუშევარი ყველაზე სიღრმისეული და გააზრებული კვლევაა 1980 წელს მომხდარი მკვლელობისა, რომელმაც მსოფლიო შეძრა. სერიალის შემქმნელმა გუნდმა ნიუ იორკის პოლიციის დეპარტამენტთან ითანამშრომლა, შესაბამისად მასალებზე სრული წვდომა ჰქონდა. აღსანიშნავია, რომ დოკუმენტურ ნამუშევარში სამართალდამცავთა ინტერვიუებიც მრავლად არის. მაყურებელს ისეთი მოწმეების ექსკლუზიური ინტერვიუებიც ელოდება, რომლებიც არაერთ შოკისმომგვრელ დეტალს მოიცავს. აღსანიშნავია, რომ ინტერვიუს რესპონდენტები ჩეპმენის ადვოკატი და ფსიქიატრიც არიან.
რეჟისორი ნიკ ჰოლტი და რობ ქოლდსტრიმი არიან. პროდიუსინგი კი Apple TV+-ს 72 Films-ს ეკუთვნით. ამ დროისათვის, სერიალის პრემიერის თარიღი ჯერ უცნობია. ლენონის მკვლელობა კინემატოგრაფიის შთაგონების წყარო აქამდე არაერთხელ გახდა. ამ მოვლენაზე გადაღებილ ფილმებს შორის არის 2007 წლის მხატვრული ბიოგრაფიული დრამა Chapter 27, რომელშიც ლენონის მკვლელის როლს ჯარედ ლეტო ასრულებს.
ჯონ ლენონი 1980 წლის 8 დეკემბერს ნიუ იორკში, მისსავე ბინის შენობასთან მოკლეს. მუსიკოსს Beatles-ის ფანმა, ჩეპმენმა ცეცხლსასროლი იარაღიდან სასიკვდილო ჭრილობა მიაყენა. მას უვადო პატიმრობა აქვს მისჯილი. 2000 წლიდან დღემდე ჩეპმენს შეწყალებაზე 12-ჯერ უთხრეს უარი.
