კომპოზიტორების და ტექსტების ავტორების ასოციაცია (SCL) რობი რობერტსონს და მარტინ სკორსეზეს საპატიო ჯილდოს გადასცემს. მუსიკოსი და რეჟისორი კოლაბორაციისათვის განკუთვნილ სპეციალურ ჯილდოს 13 თებერვალს, ლოს ანჯელესში Skirball Cultural Center-ში დაგეგმილ ღონისძიებაზე მიიღებენ.
The Spirit of Collaboration Award – ასე ჰქვია ჯილდოს, რომელსაც ასოციაცია რეჟისორისა და კომპოზიტორის დუეტს გამორჩეული პროექტებისათვის გადასცემს. 45 წლის განმავლობაში რობერტსონმა სკორსეზეს 11 ფილმის მუსიკალურ გაფორმებაზე იმუშავა. ამ ფილმებს შორის ვხვდებით ისეთ ნამუშევრებს, როგორებიც არის: The Last Waltz, Raging Bull, The King of Comedy, The Color of Money, Casino, Gangs of New York, Shutter Island, The Wolf of Wall Street, Silence, The Irishman და სკორსეზეს უახლესი კინოსურათი – Killers of the Flower Moon.
სხვადასხვა დროს SCL-ის ეს ჯილდო მიიღეს – თომას ნიუმანმა და სემ მენდესმა, ტერენს ბლენჩერდმა და სპაიკ ლიმ, კარტელ ბურუელმა და ძმებმა კოენებმა. გასული წლის ჯილდოს მფლობელი კი ჯასტინ ჰარვიცის და დემიენ შაზელის დუეტი გახდა.
რობერტსონი გასულ ზაფხულს 80 წლის ასაკში გარდაიცვალა. 23 იანვარს კომპოზიტორი ფილმის Killers of the Flower Moon საუნდტრეკისათვის ოსკარის ნომინაციაზე წარადგინეს. რობეტსონი ბოლო 47 წლის განმავლობაში პირველი გარდაცვლილი კომპოზიტორია, რომელმაც დაჯილდოების ნომინანტის სტატუსი სიკვდილის შემდგომ მიიღო. აღსანიშნავია, რომ ამერიკის კინოაკადემიამ ნომინანტად დაასახელა სკორსეზეც. 81 წლის რეჟისორმა ნომინაციები მიიღო საუკეთესო ფილმის და საუკეთესო რეჟისურის კატეგორიებში, ფილმისათვის Killers of the Flower Moon.
