22-30 ივნისს თბილისი ტრადიციულ საბალეტო ფესტივალს უმასპინძლებს. ფესტივალში თბილისის ოპერისა და ბალეტის თეატრის დასთან და ორკესტრთან ერთად მონაწილეობას მიიღებენ მსოფლიო ბალეტის ვარსკვლავები. სპექტაკლები თბილისის ზაქარია ფალიაშვილის სახელობის ოპერისა და ბალეტის სახელმწიფო თეატრში გაიმართება.
თბილისის საერთაშორისო საბალეტო ფესტივალი 2017 წელს დაარსდა. მისი სამხატვრო ხელმძღვანელი ნინო ანანიაშვილია. წელს ფესტივალი მეხუთედ ჩატარდება.
22 და 23 ივნისს ფესტივალს თანამედროვე ქორეოგრაფიის საღამოები გახსნის. საბალეტო დასი მაყურებელს ორი ერთმოქმედებიანი ბალეტის პრემიერებს შესთავაზებს. ესენია დანიელი ქორეოგრაფის, სებასტიან კლობორგის მიერ დადგმული The Test of the Best და ანტონიო ვივალდისა და ასტორ პიაცოლას მუსიკაზე შექმნილი Eyeblink, ისრაელელი ქორეოგრაფის, მარია ბარიოსის დადგმით.
25 ივნისს წარმოდგენილი იქნება ადოლფ ადანის ბალეტი „ჟიზელი”. წამყვან პარტიებს მსოფლიოში აღიარებული მოცეკვავეები დანიელ სიმკინი და მარია კოჩეტკოვა შეასრულებენ.
28 ივნისს სცენა დაეთმობა ლუდვიგ მინკუსის ორმოქმედებიან ბალეტს „ბაიადერა”, რომელშიც მონაწილეობას მიიღებენ საბალეტო დასის წამყვანი სოლისტი ნინო სამადაშვილი და ფინეთის ოპერისა და ბალეტის თეატრის წამყვანი სოლისტი მიხალ კრცმარი.
ფესტივალი 30 მაისს სპექტაკლით „გედების ტბა” დასრულდება. მაყურებლის წინაშე წარდგებიან ინგლისის სამეფო ბალეტ „კოვენტ გარდენის” წამყვანი სოლისტები: ფუნი კანეკო და ვადიმ მუნტაგიროვი.
