ალენ დელონი ფრანგული კინოს ოქროს ეპოქის ვარსკვლავი იყო, რომელიც სახასიათო კინოროლებით გახდა ცნობილი.
„იგი მშვიდად, ლუარის რეგიონში მდებარე სახლში, სამი შვილისა და ოჯახის გარემოცვაში გარდაიცვალა,” – ნათქვამია ოჯახის განცხადებაში.
ალენ დელონმა 1960-იან წლებში საყოველთაო აღიარება და ცნობადობა ისეთ ფილმებში თამაშით მოიპოვა, როგორებიც არის „როკო და მისი ძმები“ და „ლეოპარდი“. კარიერის განმავლობაში მსახიობს 90-ზე მეტი კინოროლი აქვს შესრულებული.
ალენ დელონის ბოლო მნიშვნელოვანი საჯარო გამოსვლა კანის კინოფესტივალზე 2019 წელს შედგა, რა დროსაც მას საპატიო პალმის რტო გადაეცა.
ფრანგულ კინოს ლეგენდას მიღებული აქვს მამაკაცის საუკეთესო როლის შესრულებისთვის „სეზარის“ ჯილდო, კანისა და ბერლინის კინოფესტივალების საპატიო ჯილდო, ნომინირებული იყო ოქროს გლობუსზე და მინიჭებული ჰქონდა საფრანგეთის საპატიო ლეგიონის ოფიცერის წოდება.
