რეჟისორ ემი ბერგის მიერ გადაღებული ფილმი მუსიკოს ჯეფ ბაკლის ისტორიას გვიყვება, რომლის კარიერაც და სიცოცხლეც 30 წლის ასაკში ტრაგიკულად დასრულდა. ჯეფ ბაკლი 1997 წელს მემფისში, ვულფის მდინარეში დაიხრჩო.
It’s Never Over, Jeff Buckley-ს პრემიერა პირველად Sundance-ის კინოფესტივალზე იანვარში შედგა. 8 აგვისტოს ფილმი Magnolia Pictures-ის მეშვეობით კინოთეატრებში გამოვა. ზამთარში კი მაყურებელს მისი ხილვა HBO-ზე და HBO Max-ის პლატფორმებზე შეეძლება.
დოკუმენტური ფილმის გამოსვლამდე მისი თრეილერი გავრცელდა, სადაც ჯეფ ბაკლის უნიკალური საარქივო კადრებია გამოყენებული.
ერთ-ერთ ფრაგმენტში ინტერვიუერი მუსიკოსს ეკითხება: „როგორ გსურს, რომ შენმა გულშემატკივრებმა გაგიხსენონ?“ რაზეც ჯეფ ბაკლი პასუხობს: „მხოლოდ მუსიკით, რადგან როცა მოვკვდები, ეს იქნება ერთადერთი, რაც დარჩება.“
დოკუმენტური ფილმი მუსიკოსის შესახებ აქამდე უცნობ კადრებს და მისი ახლობლების გულწფრელ მონათხრობს მოიცავს, მათ შორის დედის, მერი გიბერტის, მისი პარტნიორების, რებეკა მურის და ჯოან ვასერის და ასევე ბენდის წევრების, მაიკლ ტაიგის და პარკერ ქინდრედის ინტერვიუებს.
ფილმში ასევე მონაწილეობენ ცნობილი მუსიკოსები: ემი მანი და ბენ ჰარპერი.
„ძნელია ისეთი პერიოდის წარმოდგენა, როდესაც ჯეფ ბაკლის შესახებ დოკუმენტური ფილმის შექმნაზე არ ვფიქრობდი. ეს იდეა 2006 წლიდან მუდამ ჩემს გეგმაში იყო, როცა ჩემი პირველი ფილმი გადავიღე და ალბათ კიდევ უფრო ზუსტად, 1994 წლიდან, როცა პირველად მოვუსმინე Grace-ს. ამ მუსიკამ ჩემი ცხოვრება სამუდამოდ შეცვალა.” – განაცხადა რეჟისორმა ეიმი ბერგმა.
წლების განმავლობაში არაერთი მცდელობა ყოფილა ჯეფ ბაკლის ცხოვრების კინოეკრანზე გაცოცხლებისა, მათ შორის მსახიობ ბრედ პიტის მიერ, რომელმაც 2000 წელს მერი გიბერტთან ბიოგრაფიული ფილმის იდეა გააჟღერა.
2021 წელს მერი გიბერტი თანაპროდიუსერად გამოცხადდა ბიოგრაფიულ ფილმში Everybody Here Wants You, რომელშიც ჯეფ ბაკლის როლი რივ კარნის უნდა შეესრულებინა, თუმცა მას შემდეგ პროექტის შესახებ ახალი ცნობები აღარ გავრცელებულა.
ჯეფ ბაკლი იყო მერი გიბერტისა და ფოლკ-მუსიკოსის, ტიმ ბაკლის შვილი. მან 1994 წელს კონტრაქტი გააფორმა კოლუმბიასთან და გამოსცა სადებიუტო ალბომი Grace. ალბომმა პირველ ეტაპზე არაერთგვაროვანი შეფასებები მიიღო და Billboard 200-ზე მხოლოდ 149-ე ადგილს მიაღწია, თუმცა დღეს ის კლასიკად ითვლება.
მიუხედავად იმისა, რომ ჯეფ ბაკლის მეორე ალბომის დასრულება არ დასცალდა, დედამ, მერი გიბერტმა, შვილის დემო ჩანაწერები შექმნა და 1998 წელს გამოიცა Sketches for My Sweetheart the Drunk, რომელიც Billboard 200-ის ჩარტში 64-ე ადგილზე მოხვდა, ხოლო სიმღერამ Everybody Here Wants You გრემის ნომინაცია მიიღო საუკეთესო მამაკაცი როკ-ვოკალის შესრულებისთვის.
ნახეთ დოკუმენტური ფილმის თრეილერი: It’s Never Over, Jeff Buckley:
