თვითმხილველი, რომელიც Tomorrowland-ის ხანძარს შეესწრო, შემთხვევას დაუჯერებელს უწოდებს.
კეი სოსბერგენი იმ კომპანიისთვის მუშაობს, რომელიც ფესტივალის „კეიტერინგს” უზრუნველყოფს. ის „ბილბორდს” უყვება, რომ DreamVille-ის ტერიტორიაზე მუშაობდა, როცა დაინახა, რომ ვიღაც მთავარ სცენას ვიდეოს უღებდა.
„იქით გავიხედე და კვამლის დიდი ღრუბელი დავინახე, რომელიც ფესტივალის ტერიტორიიდან მოდიოდა. მაშინ მივხვდით, რომ რაღაც ხდებოდა. მერე ფეირვერკებიც გაეშვა და უკვე ვიცოდით, რომ რაღაც დიდი ხდებოდა. შემდეგ ჩემმა ხელმძღვანელმა დამირეკა, რომელმაც მითხრა, რომ მთავარი სცენა იწვოდა.”
სოსბერგენის თქმით, მან და მისმა კოლეგებმა დავალება მიიღეს, შეკრებილიყვნენ საკვებისა და სასმელების ტერიტორიაზე, სანამ მეხანძრეები ცეცხლის ჩაქრობას ცდილობდნენ, რაც, სოსბერგენის თქმით, ორი-სამი საათის განმავლობაში გაგრძელდა. მისივე თქმით, ტერიტორიის დატოვების ნებართვა ფესტივალის პრესკონფერენციის შემდეგ მიიღეს.
პრესკონფერენციაზე Tomorrowland-ის სპიკერმა დები უილმსენმა აღნიშნა, რომ მათი გეგმაა, ფესტივალი დაგეგმილ დღეს (18 ივლისი) დაიწყოს, თუმცა ეს მთავარი სცენის გარეშე მოხდება, როგორც ამ, ასევე შემდეგ უიკენდზე.
„ჩვენი გუნდი ყველაფერს გააკეთებს, რომ ამისგან რაღაც მშვენიერი შექმნას,” – თქვა უილმსენმა. „მოგვიწევს გარკვეული ცვლილებების განხორციელება, თუმცა მთავარი განზრახვა ისაა, რომ ყველა დიდი არტისტის გამოსვლა შედგეს. იმედი გვაქვს, ხუთშაბათისთვის უფრო მეტი სიცხადე გვექნება.”
უილმსენმა ასევე აღნიშნა, რომ ორგანიზატორები ფესტივალის გაუქმებას არ განიხილავენ, თუმცა „თუ ხვალ აღმოჩნდება, რომ ტერიტორია უსაფრთხო არ არის და ოფიციალური უწყებების ინსტრუქციებს მივიღებთ, მათ დავემორჩილებით. უსაფრთხოება ყოველთვის პრიორიტეტია.”
თითქმის არ არსებობს გამოცდილება იმის შესახებ, თუ როგორ უნდა იმოქმედონ ახლა Tomorrowland-ის ორგანიზატორებმა. ფესტივალებს ყველანაირი ამინდი შეჰხებიათ, წვიმისა და ელვიდან დაწყებული, ტორნადოებითა და ქარიშხლებით დასრულებული, მაგრამ არასდროს ყოფილა შემთხვევა, როცა მთავარი სცენა ღონისძიების დაწყებიდან ერთი დღით ადრე ხანძარს გაენადგურებინა.
Tomorrowland-ის ხანძრის მიზეზი ჯერჯერობით უცნობია. ანტვერპენის პროკურატურამ საქმეზე გამოძიება დაიწყო. ხანძრის დროს არავინ დაზარალებულა, Tomorrowland კი კვლავ გეგმავს სტრუმრებისთვის DreamVille-ის კემპინგის ტერიტორიის გახსნას. Tomorrowland-ის ინფორმაციით, ორი უიკენდის განმავლობაში ფესტივალი 400 000 ადამიანს მასპინძლობს.
ორგანიზატორებისა და ფანებისთვის მთავარი სცენის განადგურება დიდი დანაკარგია. მთავარი სცენა ფესტივალის ძირითადი ლოკაციაა, რომელიც ყველაზე დიდი არტისტების კონცერტებს მასპინძლობს და 100 000-ზე მეტ ადამიანს იტევს. პრესკონფერენციაზე უილმსენმა აღნიშნა, რომ წლევანდელ სცენაზე მუშაობა ბოლო ორი წლის განმავლობაში მიმდინარეობდა. სოციალურ მედიაში უკვე ითხოვენ ბილეთების თანხის დაბრუნებას იმ გარემოების გათვალისწინებით, რომ Tomorrowland 2025 იმის გარეშე დარჩა, რაც, უდავოდ, მისი მთავარი ხიბლია.
„Tomorrowland-ის მთავარი სცენა თავისთავად ცალკე პროექტია. ეს სუპერ განსაკუთრებულია არა მხოლოდ მათთვის, ვინც ფესტივალისთვის მუშაობს, არამედ ყველასთვის მთელი მსოფლიოს მასშტაბით, ვისაც უყვარს და ყოველწლიურად ელოდება ფესტივალის მთავარი სცენის ნახვას,” – ამბობს სოსბერგენი. „ასე რომ, ეს სიტუაცია წარმოუდგენელი იყო. პირველი საათ-ნახევარი მართლაც დაუჯერებელი იყო.”
