Tomorrowland 2025 დათქმულ დროს (18 ივლისი) გაიხსნება, ხანძრის მიუხედავად, რომელმაც 16 ივლისს ფესტივალის მთავარი სცენა სრულად გაანადგურა.
ხუთშაბათს გავრცელებულ განცხადებაში ორგანიზატორები წერენ: „ასობით ადამიანი დაუღალავად მუშაობს მთავარი სცენის ტერიტორიაზე, რათა ხვალ კარის გახსნა შევძლოთ. ეს არის რბოლა დროის წინააღმდეგ, მაგრამ ჩვენ ამას მსოფლიოში საუკეთესო და ყველაზე გასაოცარ ადამიანებთან ერთად ვაკეთებთ.”
ორგანიზატორებმა ასევე წარმოადგინეს ორი პოტენციური სცენარი ფესტივალის პირველი უიკენდისთვის. მათი განვითარება დამოკიდებული იქნება იმაზე, თუ რა პროგრესით წარიმართება სამუშაოები კარის გახსნამდე. პირველი ვარიანტის მიხედვით, „თუ მთავარი სცენის ტერიტორია უსაფრთხო იქნება და ახალი აღჭურვილობა დასრულდება, ფესტივალი გაიხსნება ისე, როგორც დაგეგმილი იყო – ყველა ვიზიტორისა და ყველა ტიპის ბილეთისთვის.”
მეორე სცენარი კი იმ შემთხვევაში განვითარდება, თუ ფესტივალის სრული დატვირთვით გახსნა ვერ მოესწრება. ამ შემთხვევაში კემპინგის სივრცე DreamVille და ძირითადი საფესტივალო ტერიტორიები „ერთმანეთისგან განცალკევებით იფუნქციონირებს, რათა უზრუნველოფილი იყოს ყველა სტუმრის უსაფრთხოება”.
თუ სცენარი ამგვარად განვითარდა, DreamVille უმასპინძლებს მთავარი სცენის არტისტებს, რომელთაც პარასკევს უნდა დაეკრათ. ამასობაში კი საფესტივალო ტერიტორიები (მთავარი სცენის გარდა) ღია იქნება სხვა ვიზიტორებისთვის.
მეორე სცენარი იმ ფაქტორის გათვალისწინებით შემუშავდა, რომ მთავარი სცენის ტერიტორია 70 000 ადამიანს იტევს. ხოლო იმ შემთხვევაში, თუ ეს ტერიტორია დაიხურება, შესაძლოა მისმა ვიზიტორებმა სხვა ტერიტორიები გადატვირთონ. ორგანიზატორების თქმით, პარასკევს ფესტივალი 14:00 საათზე (12:00-ის ნაცვლად) გაიხსნება, შაბათს კი, Tomorrowland უკვე სრულად, ყველა საფესტივალო ტერიტორიით, კარს 12:00-დან გააღებს.
აღნიშნული სცენარები მოჰყვა 16 ივლისის ხანძარს, რომელმაც სრულად გაანადგურა ფესტივალის მთავარი სცენა. შემთხვევის შედეგად არავინ დაშავებულა. ჯერჯერობით კვლავ უცნობია ხანძრის გამომწვევი მიზეზი.
Tomorrowland მსოფლიოს უდიდესი საცეკვაო მუსიკალური ფესტივალია, რომელიც ორი უიკენდის განმავლობაში ჯამში 400 000-მდე ადამიანს მასპინძლობს.
