ცნობილი გადაცემა The Late Show with Stephen Colbert ეთერში 2025-2026 წლების სეზონით, 2026 წლის მაისში დასრულდება. ამის შესახებ თავად სტივენ კოლბერტმა განაცხადა გადაცემის ჩაწერის დროს, რომელიც ნიუ იორკში, ედ სალივანის თეატრში გაიმართა.
„სანამ შოუს დავიწყებდეთ, მინდა რაღაც გითხრათ, რაც გუშინ გავიგე,“ – მიმართა აუდიტორიას კოლბერტმა. „მომდევნო წელი ჩვენი უკანასკნელი სეზონი იქნება. ტელეკომპანია შოუს მაისში დაასრულებს.“
მას შემდეგ რაც აუდიტორიამ უმაყოფილება გამოხატა, კოლბერტმა დაამატა: „ჰო, მეც თქვენნაირად ვგრძნობ თავს. ეს არ არის მხოლოდ ჩვენი შოუს დასასრული – ეს არის The Late Show-ს დასასრული CBS-ზე. ჩემს ადგილს არავინ იკავებს. უბრალოდ ყველაფერი მთავრდება.“
კოლბერტმა მადლობა გადაუხადა ტელეკომპანიას: „უნდა ვთქვა, რომ CBS-ის გუნდი შესანიშნავი პარტნიორი იყო. უზომოდ მადლობელი ვარ არხის, ამ სკამისა და ამ მშვენიერი თეატრისათვის, რომელსაც ჩემი სახლი ვუწოდე. და, რა თქმა უნდა, მადლობელი ვარ თქვენი – აუდიტორიის, ვინც ყოველ საღამოს გვიერთდებით. მშვენიერი შეგრძნებაა ამ სცენაზე ყოფნა ამ ბენდთან და არტისტებთან ერთად. განსაკუთრებულად მადლობელი ვარ იმ 200 ადამიანის, ვინც შოუს ქმნის. გითხრათ სიმართლე? ეს საოცარი სამსახურია. ვისურვებდი, რომ ვიღაც სხვა იკავებდეს ამ პოზიციას. მე კიდევ 10 თვე დიდი სიამოვნებით ვიმუშავებ ამ გასაგიჟებელ გუნდთან ერთად. სახალისო იქნება. აი, ეს მინდოდა მეთქვა.“
კოლბერტის მონოლოგის ვიდეო გადაცემის ინსტაგრამის გვერდზეც გამოქვეყნდა.
CBS-ის ხელმძღვანელებმა – Paramount Global-ის თანადირექტორმა და CBS-ის პრეზიდენტმა ჯორჯ ჩიკსმა, CBS Entertainment-ის პრეზიდენტმა ეიმი რაიზენბახმა და CBS Studios-ის პრეზიდენტმა დევიდ სტაფმა ერთობლივ განცხადებაში დაადასტურეს, რომ The Late Show კოლბერტის გადაცემის შემდეგ დასრულდება.
„The Late Show with Stephen Colbert თავის ისტორიულ ეთერს 2026 წლის მაისში დაასრულებს,“ – ნათქვამია განცხადებაში. „ჩვენ სტივენ კოლბერტს შეუცვლელად მივიჩნევთ და შესაბამისად, მის წასვლასთან ერთად The Late Show-საც დავხურავთ. გვეამაყება, რომ სტივენი CBS-ის ნაწილი იყო. ის და გადაცემა სამუდამოდ დარჩებიან ღამის სატელევიზიო შოუების პანთეონში.“
განცხადების მიხედვით, გადაწყვეტილება მთლიანად ფინანსური ხასიათისაა და არ უკავშირდება შოუს რეიტინგს, შინაარსს ან Paramount-ის შიდა საქმეებს.
„სტივენ კოლბერტისა და მისი საოცარი გუნდის ნიჭისადმი ჩვენი აღტაცება, სიყვარული და პატივისცემა ამ გადაწყვეტილებას განსაკუთრებით რთულს ხდის. სტივენმა სრულიად შეცვალა ღამის სატელევიზიო სივრცე – თავისი აქტუალური იუმორით, ძლიერი მონოლოგებით და ცნობილი სტუმრებით სხვადასხვა სფეროდან. გადაცემა უკვე მეცხრე წელია, რაც რეიტინგებით პირველ ადგილზეა ღამის სატელევიზიო სივრცეში. კოლბერტის იუმორით სავსე ფრაგმენტები ყოველდღიურად ვრცელდება ციფრულ და სოციალურ მედიაში, ხოლო შოუ მნიშვნელოვან კულტურულ მოვლენად იქცა ქვეყნისთვის. The Late Show with Stephen Colbert-ის მიღწევები შთამბეჭდავია როგორც ხარისხით, ასევე მნიშვნელობით და გავლენით,” – ნათქვამია განცხადებაში.
გადაცემა ეთერში პირველად 2015 წლის 8 სექტემბერს გავიდა – დაახლოებით ოთხი თვის შემდეგ, რაც დევიდ ლეტერმანმა 23-წლიანი ეთერის შემდეგ The Late Show with David Letterman დაასრულა. ლეტერმანის გადაცემა 1993 წლის 30 აგვისტოს დაიწყო, ბოლო ეპიზოდი კი 2015 წლის 20 მაისს გავიდა.
კოლბერტს მანამდე მიჰყავდა პოპულარული სატირული გადაცემა – The Colbert Report, რომელიც Comedy Central-ზე 2005 წლის 17 ოქტომბრიდან 2014 წლის 18 დეკემბრამდე გადიოდა.
გასულ კვირას The Late Show with Stephen Colbert-მა პრაიმტაიმის ემის ნომინაცია მოიპოვა საუკეთესი თოქ შოუების კატეგორიაში. წელს მხოლოდ სამი გადაცემაა ნომინირებული – The Daily Show (Comedy Central), Jimmy Kimmel Live! (ABC) და კოლბერტის შოუ.
