დასრულდა უკვე ტრადიციად ქცეული Tbilisi Mural Fest-ის 2025 წლის სეზონი. წელს ფესტივალი კიდევ უფრო გაფართოვდა და საქართველოს ხუთი ქალაქი მოიცვა: თბილისი, გურჯაანი, ქუთაისი, გორი და ლანჩხუთი. აღსანიშნავია, რომ ლანჩხუთში ქალაქის ისტორიაში ქუჩის ხელოვნების პირველი ნამუშევარი შესრულდა.
Tbilisi Mural Fest 2025-ის ფარგლებში ჯამში 20-მდე მურალი შეიქმნა როგორც ქართველი, ასევე საერთაშორისო არტისტების ავტორობით. ფესტივალში მონაწილეობდნენ მხატვრები მსოფლიოს სხვადასხვა ქვეყნიდან, დაწყებული ავსტრალიიდან, სერბეთით დასრულებული.
წინა წლების მსგავსად, ფესტივალმა ამჯერადაც განახორციელა პროექტი, რომელიც საქართველოს ოკუპირებულ ტერიტორიებსა და იძულებით გადაადგილებულ პირებს უკავშირდება. უკვე მეორედ შესრულდა პროექტი „აფხაზეთი“, რომლის მთავარი გზავნილია – „აფხაზეთის სახელია საქართველო.“
2025 წლის ერთ-ერთ მთავარ მიმართულებას „ცეკვის“ სერია წარმოადგენს, რომელიც ეძღვნება ქართულ ცეკვასა და მოძრაობას, როგორც კულტურული იდენტობის მნიშვნელოვან ფორმას. პროექტები საქართველოს ხუთ ქალაქში TMF Studio-სთან თანამშრომლობით შესრულდა.
ასევე განხორციელდა მორიგი 3D მურალის პროექტი თბილისის მთავარ გამზირზე, საქართველოს მეცნიერებათა აკადემიის შენობაზე. პროექტი შესრულდა ბერლინში დაფუძნებულ Studio ReSORB-თან და ვიზუალურ არტისტ სტეფან ჰიმიკთან თანამშრომლობით.
აღსანიშნავია ასევე ავლაბარში შესრულებული პროექტი „დედა და შვილი“, რომელიც Tbilisi Mural Fest-ის დამფუძნებელმა და ქუჩის ხელოვნების არტისტმა ბესიკ მაზიაშვილმა აფზალ ფირზადესთან ერთად განახორციელა. პროექტმა დიდი საერთაშორისო აღიარება დაიმსახურა.
ამავე წელს ბესიკ მაზიაშვილი მიწვეულია Street Art Cities-ის ექსპერტთა საბჭოში და მონაწილეობას მიიღებს 2025 წლის მსოფლიოს საუკეთესო მურალის შერჩევაში.
