Macklemore-ს ისრაელის მხარდამჭერმა ორგანიზაციამ მწვავე პროტესტი გამოუცხადა მას შემდეგ, რაც არტისტმა სცენიდან გააჟღერა მოწოდება: „თავისუფლება პალესტინას“.
Macklemore ამ საჯარო გზავნილით 4 სექტემბერს ნიუ-ჯერსის MetLife Stadium-ზე გამოვიდა, სადაც ის ედ შირანის Sheeran ტურნეს შეუერთდა.
„ერთ-ერთი მთავარი მიზეზი, რის გამოც ამ ტურნეში მონაწილეობა მსურდა, სწორედ ის არის, რომ ასეთ სტადიონებზე დავდგე და ვთქვა ორი სიტყვა, რომლებიც ჩემს გულთან ძალიან ახლოსაა: თავისუფლება პალესტინას. მე ვამბობ: თავისუფლება პალესტინას! მინდა ეს სიტყვები მკაფიოდ და ხმამაღლა ისმოდეს, რათა ხალხმა ღაზიდან ოკუპირებულ დასავლეთ სანაპირომდე იცოდეს, რომ ისინი არ დაგვივიწყებია,” – თქვა არტისტმა.
რეპერმა ასევე შეასრულა თავისი საპროტესტო სიმღერა – Hind’s Hall.
მისი თქმით, სჯერა, რომ დედამიწაზე მცხოვრები თითოეული ადამიანი იმსახურებს, ჰქონდეს უსაფრთხოების განცდა და მშვიდობა და არ ესმოდეს ძალადობის ხმა. „[ადამიანები იმსახურებენ] გაიგონ საბავშვო მოედანზე სიცილის ხმა და არა – თვითმფრინავებისა და ბომბების. მშობლებს ჰქონდეთ შესაძლებლობა დილით შვილებს დაემშვიდობონ ისე, რომ არ უწევდეთ ფიქრი, არის თუ არა ეს უკანასკნელი შემთხვევა, როდესაც საკუთარ შვილს კოცნიან“.
მუსიკოსმა სიტყვით გამოსვლის ბოლოს პროტესტის გამოხატვის გადაწყვეტილებაზე ისაუბრა.
„თუ იმ შიშს, რომელსაც გუშინ თვითმფრინავში ვგრძნობდი, ნებას მივცემდი შეეჩერებინა ჩემი გულისტკივილის გამოხატვა მხოლოდ იმიტომ, რომ ჩემი და მაყურებლის კომფორტი შემენარჩუნებინა, მაშინ აღარ ვიქნებოდი იმის ღირსი, რომ სცენაზე ვიდგე. ამიტომ, მე ვამბობ: თავისუფლება პალესტინას! ვამბობ – თავისუფლება ამერიკას, თავისუფლება კუბას, კონგოს, სუდანს, ირანს და ამერიკაში მცხოვრებ ყველა იმ ადამიანს, ვისაც შიშში უწევს ცხოვრება ტერორისტული ორგანიზაცია ICE-ის (საიმიგრაციო და საბაჟო სამსახური) გამო“.
Macklemore-ის პოლიტიკურმა გამოსვლამ „ისრაელ-ამერიკის საბჭოს“ (IAC) ყურადღება მიიპყრო. ორგანიზაციამ უკვე მოამზადა პეტიცია მოთხოვნით, რომ რეპერი ედ შირანის ტურნეს დარჩენილი კონცერტებიდან მოხსნან.
შირანის ვებგვერდზე 8 სექტემბრის მონაცემებით განთავსებული ინფორმაციის მიხედვით, Macklemore აშშ-ის სტადიონებზე დაგეგმილ რვა შოუს გახსნის.
„ეს იყო ედ შირანის კონცერტი და არა პოლიტიკური აქცია, საპროტესტო გამოსვლა ან აქტივისტური ღონისძიება,” – ნათქვამია IAC-ის პეტიციაში. „საკითხავი ის არ არის, აქვს თუ არა Macklemore-ს უფლება, ჰქონდეს პოლიტიკური შეხედულებები. კითხვა ის არის, სად უნდა გაივლოს ზღვარი, როდესაც შოუს გამხსნელი შემსრულებელი გლობალური საკონცერტო ტურნეს პლატფორმას ცალმხრივი პოლიტიკური დღის წესრიგის გასაჟღერებლად იყენებს. ეს კიდევ უფრო შემაშფოთებელი ხდება მაშინ, როდესაც გზავნილი ეყრდნობა შერჩევით ვიზუალურ მასალას, მიკერძოებულ შინაარსს და სადავო მტკიცებულებებს, რომლებიც ფართო აუდიტორიას ფაქტების სახით, ყოველგვარი კონტექსტისა და სიღრმისეული განხილვის გარეშე მიეწოდება“.
ორგანიზაცია ასევე მოუწოდებს ტურნეს ორგანიზატორებს, განმარტონ, იყო თუ არა წინასწარ შეთანხმებული Macklemore-ის პოლიტიკური სიტყვა, ვიზუალური კონტენტი და სიმღერის – Hind’s Hall-ის შესრულება.
Macklemore აქტიურად გამოხატავს პალესტინელების მხარდაჭერას მიმდინარე სამხედრო ოპერაციების ფონზე. 2024 წლის მაისში მან გამოუშვა სიმღერა – Hind’s Hall სტუდენტური პროტესტების მხარდასაჭერად, სადაც გააკრიტიკა აშშ-ის მიერ ისრაელის დახმარების პრაქტიკა. მან განაცხადა, რომ სიმღერის სტრიმინგიდან მიღებული მთელი შემოსავალი გაეროს პალესტინელ ლტოლვილთა დახმარების ფონდს გადაერიცხებოდა.
