მაისის პირველი ორშაბათი მოდის ინდუსტრიაში წლის ყველაზე დიდი მოვლენაა. 2024 წლის Met Gala-ს თემა უკვე ცნობილია და ეს არის Sleeping Beauties: Reawakening Fashion. თემის ფარგლებში მოწყობილ გამოფენაზე წარმოდგენილი იქნება 250 ექსპონატი კოსტიუმების ინსტიტუტის მუდმივი კოლექციიდან. „მე-17 საუკუნის ინგლისური ელისაბედის ხანიდან და კრისტიან დიორის ცნობილი იუნონასა და ვენერას კაბებიდან დაწყებული, 21-ე საუკუნის ისეთი დიზაინერებით დასრულებული, როგორებიც არიან ფილიპ ლიმი, სტელა მაკარტნი და კონერ ივსი, ეს გამოფენა მოდის 400 წლის ისტორიას ასახავს,“ – წერს „ვოგი” ინსტაგრამის პოსტში.
2024 წლის Met Gala 6 მაისს ნიუ იორკში, მეტროპოლიტენის ხელოვნების მუზეუმში გაიმართება. გამოფენა კი მუზეუმში 10 მაისს გაიხსნება. ღონისძიების ცნობილი თანათავმჯდომარეების ვინაობა ჯერ არ გამოცხადებულა.
2023 წლის Met Gala-ს თემა Karl Lagerfeld: A Line of Beauty იყო, რომლის გამოფენაზეც დიზაინერის 150-ზე მეტი ნამუშევარი იყო წარმოდგენილი. მათთან ერთად გამოიფინა ლაგერფილდის ორიგინალი ჩანახატებიც. შარშანდელი ღონისძიების თანათავმჯდომარეები იყვნენ პენელოპე კრუსი, დუა ლიპა, როჯერ ფედერერი და მიკაელა კოელი, რა თქმა უნდა, „ვოგის” რედაქტორ ანა ვინტურთან ერთად, რომელიც Met Gala-ს 1995 წლიდან უძღვება.
