ბროდვეის ლეგენდა ჩიტა რივერა 91 წლის ასაკში გარდაიცვალა. The New York Times-ის ინფორმაციით, რივერას გარდაცვალება განცხადებით დაადასტურა მისმა ქალიშვილმა ლიზა მორდენტემ.
ლეგენდარული მომღერალი, მოცეკვავე და მსახიობი თითქმის 70 წლის განმავლობაში იდგა ბროდვეის სცენაზე. იგი განასახიერებდა ისეთ საკულტო როლებს, როგორებიცაა ანიტას პერსონაჟი სპექტაკლში West Side Story (1957), როუზი სპექტაკლში Bye Bye Birdie (1960), ველმა კელი ლეგენდარულ Chicago-ში და ქალი-ობობა სპექტაკლში Kiss of the Spider Woman (1993). მისი ბოლო გამოსვლა ბროდვეის სცენაზე 2015 წელს შედგა სპექტაკლში The Visit.
2002 წელს რივერა გახდა პირველი ლათინოამერიკელი ქალი, რომელმაც კენედის ცენტრის ჯილდო მიიღო. 2009 წელს კი ბარაკ ობამამ მას თავისუფლების საპრეზიდენტო მედალი გადასცა.
