ლეგენდარულმა ინდი-როკ ჯგუფმა Arcade Fire მომავალი ალბომის გამოსვლა დააანონსა, რომლის სახელწოდებაც Pink Elephant იქნება. ამასთან, ბენდმა ახალი სინგლი Year of the Snake გააზიარა, რომელიც ალბომის პირველი ოფიციალური ჩანაწერია.
Arcade Fire-ის მეშვიდე სტუდიური ალბომი გაზაფხულზე გამოვა. მასში 10 სიმღერა შედის, რომლებიც ნიუ ორლეანში, Good News ხმის ჩამწერ სტუდიაშია ჩაწერილი. პროექტი აღწერილია, როგორც მისტიკური პანკი, რომლის მოსმენისას მსმენელი ხმოვან ოდისეაში იმოგზაურებს.
ალბომის ძირითადი თემებია: სინათლე და სიბნელე, შინაგანი სილამაზე და ინდივივიდუალური აღქმები. ალბომის სახელი Pink Elephant ფსიქოლოგიური პარადოქსის ალეგორიაა: როცა ფიქრის ნაკადის შეჩერებას ცდილობ და ეს მცდელობა კვლავ ფიქრების ნაკადად იქცევა. იგივე პრინციპია ცნობილ ფრაზაში: „ნუ იფიქრებ ვარდისფერ სპილოზე“ როცა ძალაუნებურად სწორედ მასზე ფიქრობ.
როგორც Arcade Fire-ის ინსტაგრამ პოსტშია აღნიშნული, ალბომი Pink Elephant 9 მაისს გამოვა. ჯგუფმა ასევე გაავრცელა ალბომის გარეკანიც.
Pink Elephant-ში შესული სიმღერების სია ასე გამოიყურება: Open Your Heart or Die Trying, Pink Elephant, Year of the Snake, Circle of Trust, Alien Nation, Beyond Salvation, Ride or Die, I Love Her Shadow, She Cries Diamond Rain, Stuck in My Head.
Pink Elephant Arcade Fire-ის პირველი ალბომია 2022 წლის ალბომ We-ს გამოცემის შემდეგ, რომელმაც Billboard 200-ის მე-6 ადგილი დაიკავა და Top Rock Albums ჩარტის სათავეში მოექცა.
ეს ასევე ბენდის პირველი გამოცემაა მას შემდეგ, რაც ჯგუფის ლიდერს, უინ ბატლერს რამდენიმე პირმა სექსუალურ შევიწროებაში დასდო ბრალი. ბატლერმა ბრალდებები უარყო და განაცხადა, რომ ყველა ურთიერთობა თანხმობის საფუძველზე შედგა.
აღსანიშნავია, რომ რამდენიმე დღით ადრე ბენდმა ახალი აპლიკაცია სახელად Circle of Trust გამოუშვა, სადაც გულშემატკივრებს უნიკალური კონტენტის, ალბომის მასალების, ბილეთებზე ადრეული წვდომის და ექსკლუზიური მერჩის ხილვა შეეძლებათ.
აპლიკაციაში ჯგუფმა იშვიათი კომპოზიცია Cars and Telephones გამოაქვეყნა, რომელიც, მათი თქმით, პირველი სიმღერაა, რომელიც ბატლერმა შასანს გაუზიარა.
მოისმინეთ Pink Elephant-ის პირველი სინგლი Year of the Snake და ნახეთ Arcade Fire ალბომის გარეკანი.
