ჯასტინ ბიბერმა ინსტაგრამზე ვიდეო გამოაქვეყნა, სადაც ჩანს, როგორ ხვდებიან მას გარეთ გასვლისთანავე პაპარაცები, მიჰყვებიან მანქანამდე და ხშირად გზასაც კი უღობავენ. ვიდეოში ჩანს, რომ დაცვის წევრი არაერთხელ სთხოვს პაპარაცებს, უკან დაიხიონ.
„ეს უნდა დასრულდეს,“ – წერს ვიდეოს აღწერაში ჯასტინ ბიბერი.
მომღერალი ლოს-ანჯელესის პაპარაცულ კულტურაზე აზრს სხვა პოსტებშიც გამოთქვამს. „ყველა მეუბნება, რომ ლოს-ანჯელესი დავტოვო. თქვენ გგონიათ, რომ იქიდან წავალ, სადაც ჩემი გავლენა ყველაზე მეტად არის საჭირო? როგორ შევძლებთ რამის შეცვლას, თუ სიბნელეს გავექცევით?“
ბიბერი ასევე აღნიშნავს, რომ ჰოლივუდური სტილით ცხოვრება აღარ სურს. „მე უბრალოდ მინდა, რომ მთლიანად ჩავიძირო კულტურაში, ვისწავლო ყველასგან და ყველაფრისგან და ვიყო სიყვარულისა და თანასწორობის აქტიური მხარდამჭერი.“
ჯასტინ ბიბერმა ასევე გააზიარა ლომის ფოტო წარწერით: „ვთხოვ [ღმერთს], მომცეს მოთმინება, რადგან ზოგჯერ მართლა რთულია, არ წააცალო თავი მათ [პაპარაცებს].“
კიდევ ერთ პოსტში ჯასტინ ბიბერი წერს: „დღეს საკუთარ თავსაც ვპატიობ ეგოიზმს და ვპატიობ მათაც, ვინც ჩემს გამოყენებას ცდილობს მხოლოდ იმიტომ, რომ სარგებლის მიღება სურთ.“
ბიბერი აღნიშნავს, რომ პაპარაცების გამო არაერთი ვარსკვლავის ცხოვრება დაინგრა და ტრაგიკულად დასრულდა. „ამ ყველაფერმა ადამიანების სიცოცხლეც შეიწირა. პირველ რიგში, პრინცესა დაიანა მახსენდება. მართლა უნდა შევცვალოთ რაღაცები, გთხოვთ.“
ბიბერი დიდი ხანია, რაც პაპარაცებს ღიად უპირისპირდება. 2009 წელს, როცა მხოლოდ 15 წლის იყო და მუსიკალურ სცენაზე გამოჩნდა, ფოტოგრაფები მას მუდმივად დასდევდნენ, რის გამოც არაერთხელ გამოუთქვამს პროტესტი.
ბოლო პერიოდში მომღერალი ინსტაგრამზე გულახდილი პოსტებით გამოირჩევა. ცოტა ხნის წინ დაწერა, რომ ცდილობს, აპატიოს ადამიანებს, ვინც ინტერნეტში ჭორებს ავრცელებს. „სიმართლე გითხრათ, თქვენს ადგილას მეც შემშურდებოდა, როცა ჩემი და ჰეილის წყვილს ერთად დავინახავდი,“ – წერს ჯასტინ ბიბერი.
