კალიფორნიის ქალაქ სანტა მონიკაში ტელეკომპანია Nickelodeon-ის ყოველწლიური დაჯილდოება Kids’ Choice ჩატარდა, რომელსაც ჰიპ ჰოპ არტისტი, ჯეკ ჰარლოუ დაესწრო. ის ბავშვების წინაშე სცენაზე პერფორმანსით წარდგა და კომპოზიციები: Nail Tech, Industry Baby და First Class შეასრულა.
• მოუსმინეთ: ჯეკ ჰარლოუმ ახალი სინგლი First Class გამოუშვა
ჰარლოუ დაჯილდოების ცერემონიაზე დასახელებული იყო ნომინაციაში ბავშვების რჩეული პოპულარული არტისტი Glass Animals-თან, ქლოისთან, უოკერ ჰეიესთან, სოუითისთან და ოლივია როდრიგოსთან ერთად. გამარჯვება ამ უკანასკნელს ხვდა წილად.
ჯეკმა რეჩიტატივის კითხვა 12 წლის ასაკში დაიწყო. მისი პირველი მიქსტეიპი 2011 წელს გამოიცა. მას შემდეგ კენტუკელმა მუსიკოსმა რამდენიმე სტუდიური ნამუშევარი გამოაქვეყნა, თუმცა, ფართო საზოგადოების ყურადღება მან 2020 წლის კომპოზიციით Whats Poppin დაიმსახურა. ექვსმაგი პლატინის სტატუსის მფლობელი ტრეკის რემიქსი ჰარლოუს არაერთმა პოპულარულმა კოლეგამ ჩაწერა. 2020 წლის დეკემბერში რეპერმა გაყიდვაში სადებიუტო ალბომი That’s What They All Say ჩაუშვა, რომელიც Billboard 200-ში მეორე პოზიციაზე გავიდა. ასევე, აღსანიშნავია 2021 წელს ლილ ნას იქსთან კოლაბორაციით შექმნილი სიმღერა Industry Baby, რომელიც ბილბორდის ცხელი ასეულის სათავეში მოხვდა.
