ბრიუს სპრინგსტინმა დონალდ ტრამპის კრიტიკა მომდევნო კონცერტზეც განაგრძო. მუსიკოსი უკან არ იხევს მას შემდეგ, რაც აშშ-ის პრეზიდენტმა მას „გადაჭარბებულად შეფასებული”, „ხისთავიანი” და „გამომშრალი ჩირი” უწოდა. ტრამპმა ამ გამონათქვამებით სპრინგსტინის მიერ კონცერტზე გაკეთებულ განცხადებას უპასუხა, სადაც მუსიკოსმა აშშ-ის მთავრობა მოიხსენია, როგორც „კორუმპირებული, არაკომპეტენტური და მოღალატეობრივი ადმინისტრაცია”.
„ახლა ისეთი რაღაცები ხდება, რაც ჩვენი ქვეყნის დემოკრატიულ ბუნებას ცვლის და ეს ზედმეტად მნიშვნელოვანია იმისთვის, რომ დააიგნორო,” – თქვა სპრინგსტინმა კონცერტზე.
„ჩემს სახლში ადამიანებს სიტყვის თავისუფლებისა და განსხვავებული აზრის გამოთქმისთვის დევნიან. აი, ეს ხდება ახლა. ამერიკაში ყველაზე მდიდარი კაცები სიამოვნებას იღებენ მსოფლიოს ყველაზე ღარიბი ბავშვების გაჭირვებითა და მათი სასიკვდილოდ მიტოვებით. აი, ეს ხდება ახლა. ჩემს ქვეყანაში სადისტურ სიამოვნებას იღებენ იმ ტკივილით, რასაც ისინი ამერიკელ მუშაკებს აყენებენ.”
„ისინი ამერიკის ქუჩებს წმენდენ რეზიდენტებისგან და კანონის საწინააღმდეგოდ, დაკავების იზოლატორებში გადაჰყავთ, როგორც პატიმრები. აი, ეს ხდება ახლა. ჩვენ მიერ არჩეული წარმომადგენლების უმრავლესობამ თავი ვერ გაართვა ამერიკელი ხალხის დაცვას შეუფერებელი პრეზიდენტისა და თაღლითი მთავრობის შეურაცხყოფისგან. მათ წარმოდგენა არ აქვთ, თუ რას ნიშნავს, იყო სულითა და გულით ამერიკელი.”
სპრინგსტინმა სიტყვა ოპტიმისტურ ნოტზე დაასრულა და ნოველისტისა და სამოქალაქო უფლებების აქტივისტის, ჯეიმს ბოლდუინის ციტატა მოიყვანა: „ამერიკა, რომლისთვისაც 50 წელია ვმღერი, ნამდვილია. მიუხედავად მისი არაერთი ნაკლისა, ის დიდებული ქვეყანაა დიდებული ხალხით და ჩვენ ამ მომენტსაც გადავლახავთ. მაქვს იმედი, რადგან მჯერა იმისა, რასაც ამერიკელი მწერალი ჯეიმს ბოლდუინი ამბობდა: „ამ სამყაროში არ არსებობს იმდენი ჰუმანურობა, რამდენსაც ვისურვებდით, მაგრამ არსებობს საკმარისი.”
16 მაისს, 2 დღის შემდეგ, რაც სპრინგსტინმა მსგავსი კრიტიკა კონცერტის სცენიდან პირველად გაავრცელა, ტრამპმა მას სოციალური ქსელით უპასუხა.
