გლასტონბერის ფესტივალის მეორე დღეს მთავარი სცენების დიდ დაპირისპირება შედგა. მაშინ, როცა Pyramid-ზე ნილ იანგი იდგა, მაყურებელს დანარჩენ სცენებს შორის საკმაოდ რთული არჩევანი ჰქონდა – Charli xcx-ს, Scissor Sisters-სა და Doechii-ს შორის.
ბევრმა არჩევანი Doechii-ზე გააკეთა, რომელმაც თავისი გამოსვლის განმავლობაში მაყურებელს სრულიად უნიკალური, 45-წუთიანი თეატრალური წარმოდგენა შესთავაზა, რომელიც მოიცავდა სიმღერას, ცეკვას, რეპსა და მომღერლის განუმეორებელი საშემსრულებლო ტალანტის დემონსტრირებას.
ტრიუმფი კიდევ უფრო შთამბეჭდავი გახადა იმ ფაქტმა, რომ ეს ფესტივალზე Doechii-ს დებიუტი იყო. დისკოგრაფიაში მხოლოდ ერთი სტუდიური ალბომით – 2024 წლის Alligator Bites Never Heal – არსებობდა ეჭვები, თუ როგორ გაართმევდა მუსიკოსი თავს ასეთი მასშტაბური შოუს ჰედლაინერობას. თუმცა DJ Miss Milan-თან ერთად Doechii-მ ჰიპ-ჰოპისა და საცეკვაო კომპოზიციების შერწყმით მაყურებელს დაუვიწყარი გამოცდილება აჩუქა, რომელიც კლუბურ საღამოს უფრო ჰგავდა, ვიდრე ტრადიციულ სტრუქტურირებულ კონცერტს.
წარმატებული წლის გათვალისწინებით – რაც მოიცავს „ბილბორდის” წლის ქალის წოდებას – ლოგიკურია, რომ გრემის მფლობელი მომღერალი ერთ-ერთი უდიდესი ფესტივალის ჰედლაინერი გახდა. ის, რის მიღწევასაც, როგორც წესი, წლები ან დეკადებიც კი სჭირდება, Doechii -ს პირველივე ცდაზე გამოუვიდა. ამით კი კონკურენციის სათავეში მოექცა და დაამტკიცა, რომ მისი თაობის ერთ-ერთი საუკეთესო მუსიკოსია.
