Coachella 2026-ის ლაინაფი ცნობილია. ჯასტინ ბიბერი, საბრინა კარპენტერი და Karol G მომდევნო წლის Coachella Valley Music and Arts Festival-ის ჰედლაინერები იქნებიან. ფესტივალი 10–12 და 17–19 აპრილს კალიფორნიაში, Empire Polo Club-ში გაიმართება.
სამივე არტისტი ამჟამად თავის ჟანრში ერთ-ერთი საუკეთესოა. ბიბერი სცენაზე მოულოდნელად დაბრუნდა ალბომით Swag, რომელიც ივლისში Billboard 200-ის ჩარტში მეორე ადგილზე მოხვდა, ხოლო ჩანაწერის 16 სიმღერა Billboard Hot 100-ში შევიდა. კარპენტერმა ამ თვის დასაწყისში ჩარტის დომინანტი პოზიცია დაიკავა ახალი ალბომით – Man’s Best Friend, რაც მისი მეორე №1 ალბომია, წარმატებული Short n’ Sweet-ის შემდეგ, რომელიც 2024 წელს გამოვიდა. Karol G კი გასულ წელს პირველი ლათინოამერიკელი ქალი გახდა, რომელმაც Billboard Women In Music-ის ყოველწლიურ დაჯილდოებაზე წლის ქალი არტისტის ჯილდო მიიღო.
ფესტივალის ლაინაფის საინტერესო ნაწილია Anyma-ს მონაწილეობა. ის იტალიელ-ამერიკელი ტექნო პროდიუსერია, რომელმაც თავისი გამოსვლებით Sphere-ში აუდიტორია აღაფრთოვანა. ფესტივალზე არტისტი თავისი პროექტის – Anyma presents Æden-ის მსოფლიო პრემიერას წარმოგვიდგენს.
პოსტერის ბოლოში ნაჩვენებია საინტერესო კომენტარი: “The Bunker Debut Of RADIOHEAD KID A MNESIA.” 2021 წელს Radiohead-მა Kid A Mnesia სახელით, კომპილაციის სახით ხელახლა გამოუშვა 2000 წლის ალბომი Kid A და 2001 წლის Amnesiac. ასე რომ, სავარაუდოდ, ფანები კლასიკური ალბომების მოსმენას სწორედ Amnesiac-ის 25 წლის იუბილესთან დაკავშირებულ პერიოდში შეძლებენ.
ფესტივალის პროგრამა კვლავ მოიცავს მრავალფეროვან ჟანრებს, რათა ყველა გემოვნების მსმენელისთვის Coachella დასამახსოვრებელი გამოცდილება იყოს.
ფესტივალის პირველი დღე დაეთმობა არტისტებს, როგორებიც არიან: The XX, Disclosure, Teddy Swims და Devo. მეორე დღეს სცენაზე გამოვლენ The Strokes, GIVĒON, ადისონ რეი, Labrinth, David Byrne და სხვები. მესამე დღეს გამოვლენ Young Thug, Kaskade, BIGBANG და მრავალი სხვა.
Coachella-ს აბონემენტების გაყიდვა 19 სექტემბერს დაიწყება.
