ლექსო რატიანის სიმღერა და ვიდეოკლიპი  „საქართველოში მარტო“

26 სექტემბერს ლექსო რატიანმა მსმენელს სიმღერა და მასზე გადაღებული ვიდეორგოლი „საქართველოში მარტო“ წარუდგინა. როგორც თავად მუსიკოსი ამბობს, ეს კომპოზიცია თინეიჯერობაში დაწერა, კლიპის გადაღება კი სამი წლის წინ დაიწყეს, თუმცა მასზე მუშაობა ახლახანს განახლდა: 

 „ეს არის ჩემი თინეიჯერობის დროს დაწერილი სიმღერა, რომელზეც სამი წლის წინ გადავიღეთ კლიპი. შემდეგ მუსიკაში რაღაცები აღარ მოგვეწონა და გარკვეული ხნით თაროზე შემოვდეთ. ეს გარკვეული დრო კი სამ წელს გაგრძელდა. ახლახან დავამთავრეთ მასზე მუშაობა, გამოვაქვეყნეთ და იმედი მაქვს, ხალხს მოეწონება.“  –  ამბობს ლექსო რატიანი.

სიმღერის მუსიკისა და ტექსტის ავტორი თავად ლექსო რატიანია, ხოლო მუსიკალური პროდიუსინგი თორნიკე გველესიანს და ირაკლი მარგიშვილს ეკუთვნის. თორნიკე გველესიანს ეკუთვნის ასევე მიქსი და მასტერინგი, ხმის ჩამწერი ინჟინერი კი ალეკო ბერძენიშვილი იყო. ინსტრუმენტულ ნაწილში მონაწილეობენ გიგი კობერიძე (დასარტყამი), სიმონ ბითაძე (ბასი), მარიამ კოკელაძე (ბექ ვოკალი) და ბექა გოჩიაშვილი (სინთეზატორი).

ვიდეორგოლის რეჟისორი ირაკლი მარგიშვილია, სცენარის ავტორი – მინდია არაბული, ოპერატორი კი  შიო ხიდაშელი. მხატვრულ გაფორმებაზე მარიამ საკნელაშვილი, ნანა გაბელაია და კესანე ბაბუნაშვილი ზრუნავდნენ.

 მოისმინეთ ლექსო რატიანის სიმღერა:  „საქართველოში მარტო”