21 ივნისს Loco Park-ში ინგლისელი მუსიკოსის, ტომ ოდელის კონცერტი გაიმართა. ღონისძიება FLITZ Collective-ის ორგანიზებით ჩატარდა. ოდელი თბილისს 2026 წლის მსოფლიო ტურნეს ფარგლებში ეწვია. მუსიკოსმა კონცერტის დროს არაერთი ჰიტი შეასრულა. მან შოუ დახურა 2013 წლის ჰიტით – Another Love.
კონცერტის მსვლელობისას არტისტი აუდიტორიასთან კომუნიკაციასაც ამყარებდა. შოუს ბოლოს მან მსმენელს მადლობა გადაუხადა.
ტომ ოდელმა საერთაშორისო აღიარება თავისი ემოციური ინდი-პოპ კომპოზიციებით მოიპოვა. მისი მუსიკა ხასიათდება მელანქოლიური განწყობით, ძლიერი ვოკალური პარტიებით და ფორტეპიანოს წამყვანი ჟღერადობით. ტომ ოდელი მსმენელის დიდმა აუდიტორიამ 2012 წელს გაიცნო სადებიუტო EP-ით – Songs from Another Love.
ფოტო: ნინუცა კაკაბაძე/Billboard Georgia
2013 წელს ტომ ოდელმა გაიმარჯვა BRIT Awards-ის ნომინაციაში – კრიტიკოსთა რჩეული. ამ ნომინაციაში სხვადასხვა დროს ჯილდო არაერთმა აღიარებულმა ვარსკვლავმა მიიღო, მაგალითად ადელმა.
საქართველოს შემდეგ ტომ ოდელი კონცერტს 23 ივნისს სტამბულში გამართავს, შემდეგ კი ტურნეს ფარგლებში ევროპის სხვა ქვეყნებს ეწვევა.
