ამერიკელმა პოპვარსკვლავმა, ქრისტინა აგილერამ 5 ტრეკისგან შემდგარი ესპანურენოვანი EP სახელწოდებით La Tormenta გამოუშვა. სხვა სიმღერებთან ერთად მასში შედის არგენტინელ Tini-სთან თანამშრომლობით შექმნილი კომპოზიცია Sueltame.
La Tormenta-მდე ქრისტინამ 2022 წლის იანვარში La Fuerza გამოუშვა, რომელიც მუსიკოსის პირველი ესპანურენოვანი ჩანაწერი გახლდათ 2000 წლის ალბომის Mi Reflejo შემდეგ. ეს უკანასკნელი ბილბორდის ლათინური ალბომების ჩარტში მაშინ პირველ პოზიციაზე გავიდა. იგივე წარმატება ერგო 22 წლის შემდეგ გამოცემულ ნამუშევარს La Fuerza.
ქრისტინა აგილერამ შემოქმედებითი მოღვაწეობა 1992 წელს დაიწყო. კარიერის განმავლობაში მან 75 მილიონზე მეტი ჩანაწერის გაყიდვა მოახერხა. არტისტს გრემის პრესტიჟული ჯილდო 5-ჯერ აქვს მოპოვებული. მას ჰოლივუდის დიდების ხეივანში ვარსკვლავიც გაუხსნეს. შემსრულებლის დისკოგრაფია 8 სტუდიურ ალბომს ითვლის, რომელთაგან ექვსი Billboard 200-ის ჩარტის ათეულშია მოხვედრილი.
