სამხრეთკორეული ბოიბენდი SEVENTEEN სამწლიანი პაუზის შემდეგ რიგით მეოთხე სტუდიურ ალბომს Face the Sun ავრცელებს. კოლექტივმა ჩანაწერში შესულ სინგლზე Hot გადაღებული ვიდეორგოლიც გამოაქვეყნა. 9 ტრეკისგან შემდგარი სტუდიური ნამუშევარი მოიცავს მიმდინარე წლის აპრილში გამოშვებულ ინგლისურენოვან კომპოზიციას Darl+ing.
ცნობილია, რომ ალბომში შესულ ტრეკებზე პროდიუსერებთან ერთად კოლექტივის მთავარმა ვოკალისტმა, ვუზიმ იმუშავა. ამასთან, ლეიბლ HYBE-ის ცნობით, თაყვანისმცემლებმა სტუდიური ჩანაწერის ორი მილიონი ეგზემპლარი წინასწარ შეიძინეს. აღსანიშნავია, რომ კოლექტივი მიმდინარე წლის აგვისტოდან ამერიკის შეერთებულ შტატებში ახალი ნამუშევრის მხარდამჭერ ტურნეს The Be the Sun Tour დაიწყებს.
ჯგუფმა ბოლო ჩანაწერი, რიგით მეცხრე მინი ალბომი Attacca გასული წლის ოქტომბერში გამოაქვეყნა. ნამუშევარი 25 მილიონი გაყიდული ეგზემპლარით “ბილბორდის” ჩარტში Top Album Sales პირველ პოზიციაზე გავიდა.
ბოიბენდმა SEVENTEEN, რომელშიც 13 წევრია, შემოქმედებითი მოღვაწეობა 2013 წელს დაიწყო. ორ წელიწადში ბიჭებმა სადებიუტო EP სახელწოდებით 17 Carat გამოუშვეს. კოლექტივი სამ ნაწილადაა დაყოფილი: ჰიპ ჰოპ შემსრულებლებად, მომღერლებად და მოცეკვავეებად. ჯგუფს დღემდე ოთხი სტუდიური ალბომი აქვს გამოშვებული.
