ტანსაცმლის ბრენდი „გეფი” განცხადებას ავრცელებს, სადაც ნათქვამია, რომ ის დაუყოვნებლივ ნაბიჯებს დგამს, რომ კანიე უესტთან დაკავშირებული ყველანაირი პროდუქტი გაყიდვიდან ამოიღოს. მიზეზი რეპერის მიერ გაკეთებული ანტისემიტური კომენტარებია.
„სექტემბერში ჩვენ განვაცხადეთ Yeezy Gap-ის თანამშრომლობის შეწყვეტის შესახებ. ჩვენი ყოფილი პარტნიორის ბოლოდროინდელი განცხადებები და ქმედებები ნათელს ხდის, თუ რატომ. ანტისემიტიზმი, რასიზმი და ნებისმიერი ფორმის სიძულვილი უპატიებელი და შეუსაბამოა ჩვენს ღირებულებებთან. ჩვენი მომხმარებლის, თანამშრომლებისა და მეწილეების სახელით, ურთიერთობა გვაქვს მხოლოდ ისეთ ორგანიზაციებთან, რომლებიც ებრძვიან სიძულვილსა და დისკრიმინაციას”, – ნათქვამია „გეფის” განცხადებაში.
რეპერის ბოლოდროინდელმა სადავო ინტერვიუებმა, ასევე მისმა მაისურმა წარწერით “White Lives Matter” საბოლოოდ მისი ბიზნესის ნგრევა გამოიწვია. კომპანია ადიდასმა ასევე მიიღო მასთან თანამშრომლობის შეწყვეტის გადაწყვეტილება. „ადიდასი არ დაუშვებს ანტისემიტიზმსა და ნებისმიერი სხვა სახის სიძულვილის ენას. კანიეს კომენტარები და ქმედებები ჩვენთვის მიუღებელი, სიძულვილით სავსე და საშიშია. ის არღვევს კომპანიის ღირებულებებს მრავალფეროვნების, ინკლუზიისა და საერთო პატივისცემის შესახებ.”
რეპერს შეეზღუდა წვდომა ტვიტერსა და ინსტაგრამზეც. მის მიერ გავრცელებული ანტისემიტური პოსტების გამო. მასთან ურთიერთობა გაწყვიტა ბალენსიაგამაც.
კანიე უესტის ყოფილი მეუღლე კიმ კარდაშიანი და მისი და ქლოი ასევე გმობენ რეპერის ქმედებებს.
