მას შემდეგ, რაც Spotify-მ წლის შემაჯამებელი ე.წ. Wrapped კამპანია დაიწყო, კანადელმა რეპერმა Drake-მა გააზიარა ინფორმაცია, თუ ვის უსმენდა წლის განმავლობაში ყველაზე ხშირად.
Drake-მა Instagram-ის ისტორიაში გაამხილა, რომ ამ სიაში მოწინავე არტისტი გარდაცვლილი რეპერი თუფაქ შაკურია. Drake-ის თქმით, 2Pac-ს 246 წუთის განმავლობაში უსმენდა, რითაც 2022 წლის მონაცემებით, თუფაქ შაკურის მსმენელთა მოწინავე შვიდ პროცენტში მოხვდა.
ეს გასაკვირი არც უნდა იყოს. წარსულში Drake საკმაოდ ხშირად ახსენებდა შაკურს. „თუკი შემეძლებოდა ვინმეს დავმსგავსებოდი, ეს 2Pac იქნებოდა“ – თქვა Drake-მა 2011 წელს Boombox-თან საუბრისას. „ვფიქრობ, რომ გარდა თავისი მუსიკისა, რომელიც სრულიად არაჩვეულებრივი იყო, ის ადამიანებს საკუთარი თავით ხიბლავდა. ის თავისუფალი სული იყო და არაფერი ადარდებდა, აკეთებდა უბრალოდ იმას, რასაც გრძნობდა. ვისურვებდი, რომ ჩემს პიროვნებაში სულ ცოტა 2Pac იყოს. ამაზე ვმუშაობ”
Spotify-ის ყოველწლიური შემაჯამებელი Wrapped კამპანია, პირველად 2016 წლის დეკემბერში დაიწყო. მუსიკალური სტრიმინგ სერვისი მომხმარებლებს საშუალებას აძლევს, გასული წლის აქტივობის მონაცემები ნახონ და შემდეგ ეს ინფორმაცია სოციალური მედიის მეშვეობით გააზიარონ.
