ნოემბრის დასაწყისში Apple TV+-ზე სელენა გომესის შესახებ გადაღებული დოკუმენტური ფილმის, My Mind & Me პრემიერა შედგა. ამჯერად კი მომღერალმა ამავე სახელწოდების სიმღერის მუსიკალური ვიდეო გაავრცელა. ვიდეო დოკუმენტური ფილმის კადრებით არის შექმნილი.
ვიდეოს გამხსნელ სცენაში ვხედავთ პიანინოსთან მჯდომ სელენა გომესს, რომელიც კომპოზიციის მელოდიას უკრავს. კლიპში ასევე ჩანს სიმღერის ჩაწერის ფრაგმენტები. ამის შემდეგ კი ვიდეოში შემოდის დოკუმენტური ფილმის კადრები, რომლებიც ასახავს სელენა გომესის სასცენო გამოსვლებს, მეგობრებთან, ოჯახის წევრებთან და თაყვანისმცემლებთან ერთად გადაღებულ კადრებს, მოგზაურობის ეპიზოდებს და ასე შემდეგ.
„ჩემი გონება და მე/ ჩვენ ხანდახან ვერ ვეწყობით ერთმანეთს/ და სუნთქვა რთული ხდება/ მაგრამ მე არ შევცვლიდი ჩემს ცხოვრებას“ – ეს არის სიტყვები, რომელიც სიმღერის ტექსტში გვესმის.
დოკუმენტური ფილმის პრემიერაზე, Billboard-მა სელენა გომესს ინტერვიუ ჩამოართვა. მომღერალმა აღნიშნა, რომ თავდაპირველად ფილმის გამოშვებასთან დაკავშირებით ყოყმანობდა.
„რამდენჯერმე დავაპირე დოკუმენტური ნამუშევრის გამოშვება, მაგრამ ვგრძნობდი, რომ სწორი დრო არ იყო“ – ამბობს გომესი – “შემდეგ პანდემია დაგვატყდა თავს და უამრავმა ადამიანმა მენტალური ჯანმრთელობის შესახებ დაიწყო საუბარი. იზოლაციისას ადამიანებს დეპრესია და შფოთვითი აშლილობები აწუხებდათ. მათ ეუფლებოდათ გრძნობები, რომლებიც ადრე არასდროს განუცდიათ. ვიმედოვნებ, რომ ეს ნამუშევარი გადაიზრდება დიალოგში, რაც საბოლოოდ ადამიანებს დაეხმარება”.
იხილეთ მუსიკალური ვიდეო – My Mind & Me.
