Coldplay-მ თავის ფანებს მოუწოდა, რომ ლონდონში მდებარე ერთ-ერთ Პოპ-აპ მაღაზიას ესტუმრონ და საქველმოქმედო ინიციატივას შეუერთდნენ. Choose Love – არასამთავრობო ორგანიზაციის მიერ გახსნილი მაღაზია და პროექტია. წელს მას მხარს სწორედ Coldplay უჭერს. მუსიკალურმა კოლექტივმა ფანებს მიმართა, რომ მაღაზიის ფიზიკურ სივრცეში, ან მის ოფიციალურ ვებ გვერდზე, ლტოლვილებისათვის საჭირო ნივთები შეიძინონ.
„თქვენ შეგიძლიათ ლტოლვილებისა და იძულებით გადაადგილებული პირებისათვის შეიძინოთ ისეთი აუცილებელი ნივთები, როგორებიც არის: თბილი მოსაცმელები, ცხელი საკვები, ან გათბობისათვის საჭირო საწვავი“ – ვკითხულობთ Coldplay-ს მიერ გამოქვეყნებული ვიდეოს აღწერაში.
ვიდეოში ჩანს მაღაზიაში შესვლის მსურველთა გრძელი რიგი. ამასთან ერთად, ვხედავთ დახლებზე წარმოდგენილ ნივთებსაც. როგორც პრომო ვიდეოდან ირკვევა, ყოველი ნივთი, რომელსაც მაღაზიაში შეიძენენ, პირდაპირ იმ ადამიანებთან გაიგზავნება, ვისაც ეს დახმარება ძალიან სჭირდება.
რაც შეეხება ჯგუფის მუსიკალურ მოღვაწეობას, მომავალ წელს Coldplay-ს ევროპის ტურნე აქვს დაგეგმილი. კონცერტები 2023 წლის გაზაფხულზე დაიწება და ზაფხულის მიწურულს დასრულდება.
ნახეთ საქველმოქმედო მაღაზიის მხარდასაჭერი ვიდეო, რომელიც Coldplay-მ საკუთარ ტვიტერსა და ინსტაგრამზე გამოაქვეყნა:
Please consider a visit to the @chooselove online shop https://t.co/z8mSZeNxGr to buy essential supplies like warm coats, hot food and heating fuel for refugees and displaced people all over the world this winter. pic.twitter.com/O1vodO3wlw
— Coldplay (@coldplay) December 20, 2022
